მმართველი პარტიის ერთ-ერთი ლიდერის, მამუკა მდინარაძის განცხადებით, ერთპარტიულ პარლამენტში, სადაც მინისტრობის კანდიდატებს კითხვებს მხოლოდ ქართული ოცნების დეპუტატები უსვამდნენ, "კრიტიკაც იყო, სამომავლო გეგმებზე და ხარვეზებზე საუბარიც იყო".

"მიდის საქმიანი განხილვა და ძალიან კარგი იქნებოდა, თავიანთი კრიტიკული და თუნდაც, სპეკულაციური მესიჯებით მოხვედრილიყო ოპოზიციის წარმომადგენელი. თუმცა ისინი უარს აცხადებენ, შესაბამისად, ჩვენ მათ გარეშე ყველა ხარვეზთან დაკავშირებით, გეგმებთან დაკავშირებით, ვცდილობთ, რომ კითხვები დავსვათ მინისტრებთან და მივიღოთ ადეკვატური პასუხი", — განაცხადა მან.

დღეს პარლამენტში მინისტრობის კანდიდატებს უსმენენ. ოფიციალურად პარლამენტმა მუშაობა 11 დეკემბერს დაიწყო. ამის პარალელურად, ბარიერგადალახულმა ოპოზიციურმა პარტიებმა საკუთარ მანდატებზე უარი თქვეს. ქართული ოცნება ამბობს, რომ ყველა ასეთ პარტიას მანდატები გაუუქმდება, ხოლო დაფინანსება შეუწყდება. მმართველი ძალის განცხადებითვე, ისინი დააინიცირებენ კანონპროეტქს, რომლის თანახმადაც საარჩევნო რეგისტრაცია გაუუქმდება პარტიას, რომლის ლიდერიც კონსტიტუციურ საარჩევნო ცენზს არ აკმაყოფილებს, კერძოდ, არის უცხო ქვეყნის მოქალაქე ან მისჯილი აქვს თავისუფლების აღკვეთა.

თუ გინდა გაიგო, როგორ მუშაობს ან ვერ მუშაობს მე-10 მოწვევის პარლამენტი, რა ინიციატივები აქვთ დეპუტატებს და ზოგადად, როგორ მიიღება გადაწყვეტილებები, რომლებიც ჩვენს ყოველდღიურობას განსაზღვრავს, შემოგვიერთდი ჯგუფში – რა ხდება პარლამენტში.