დაავდებათა კონტროლის ეროვნული ცენტრის ხელმძღვანელმა, ამირან გამყრელიძემ განაცხადა, რომ იმ შემთხვევაში, თუ ფაიზერის ვაქცინა გვექნება, მისი შესანახი სპეციალური მაცივრები ქვეყანაში 40 ცალია და ნაწილიც შესყიდვის პროცესშია.

"რაც შეეხება ცივ ჯაჭვს ფაიზერთან დაკავშირებით, სადაც მინუს 70-80 გრადუსი სჭირდება, ასეთი, დაახლოებით, 40 მაცივარი გვაქვს ქვეყანაში, რომლებიც დაკავებულია ბევრი სხვადასხვა ტესტ სისტემებით. უკვე შეფასება გაკეთდა, რამდენის გამოთავისუფლება შეგვიძლია, ასევე, შესყიდვის პროცესშია რამდენიმე ასეთი მაცივარი. ამ სისტემის გამართვა შეგვიძლია დიდ ქალაქში, თუ ფაიზერის ვაქცინა ხელმისაწვდომი იქნება", — განაცხადა ამირან გამყრელიძემ.

გამყრელიძის თქმით, მოდერნას ვაქცინის შემთვევაში კი, მინუს 20-გრადუსიანი, შესაბამისი მაცივრები, მუნიციპალიტეტების დონემდე არის ქვეყანაში და მისი დანერგვა თავისუფლად იქნება შესაძლებელი.