ევროვიზიის რიგით 62-ე კონკურსი Eurovision Song Contest 2017 უკრაინის დედაქალაქ კიევში გაიმართება. 9 და 11 მაისს ნახევარფინალები, ხოლო 13 მაისს ფინალური კონცერტი გაიმართება, რომელსაც პირდაპირ ეთერში ვიხილავთ.

ვიდრე 2017 წლის გამარჯვებულის ვინაობას გავიგებდეთ, ქართველ მსმენელს ჟიურის როლის მორგება და 25 ქართველი მომღერლიდან თუ მუსიკალური ჯგუფიდან, საუკეთესოს გამოვლენა მოუწევს. ეროვნული კონკურსის ფინალი 20 იანვარს, 20:00 საათზე, თბილისის საკონცერტო დარბაზში ჩატარდება. გამარჯვებულს კი მაყურებელთან ერთად საერთაშორისო ჟიური გამოავლენს.

მაშ ასე, ეროვნულ კონკურსში მონაწილეობენ:

1. გიორგი ჩიქოვანი - Make it Right

გიორგი ჩიქოვანი მაყურებელს პროექტ ნუცას სკოლიდან ახსოვს, სადაც მან პირველი ადგილი მოიპოვა, ასევე მონაწილეობდა პროექტებში ახალი ხმა და ორი ვარსკვლავი.

2. ბრენდონ სტოუნი და ეთერ ბერიაშვილი - Heyo Song

მომღერალი ბრენდონ სტოუნი იგივე ბესიკ შპეტიშვილი 8 წლის განმავლობაში პროექტ ახალი ტალღის მუსიკალური პროდიუსერი იყო.

3. რატი დურგლიშვილი - Why

რატი დურგლიშვილი საზოგადოებამ დუეტ ჯორჯიადან გაიცნო. ამჟამად მომღერალი ახალ ალბომზე მუშაობს.

4. ანდრია გველესიანი - Revolutionise

ანდრიას სცენაზე დგომის საკმაოდ დიდი გამოცდილება აქვს. ის გემახსოვრებათ პროექტებიდან: ჯეოსტარი, უკრაინული X ფაქტორი და ცეკვავენ ვარსკვლავები.

5. ალისა დანელია - We Are Eternity

ალისამ ჯაზისა და საესტრადო ხელოვნების სახელმწიფო მუსიკალური კოლეჯი დაამთავრა, ასევე სწავლობდა გნესინის სახელობის რუსეთის მუსიკალურ აკადემიაში.

6. ნუცა ბუზალაძე - White Horses Run

ნუცა ბუზალაძე 5 წლიდან მღერის და დღეს ერთ-ერთი ყველაზე წარმატებული მომღერალია საქართველოში.

7. მალიბუ - We Live Once

მალიბუ 2016 წელს მონაწილეობდა პროექტ X ფაქტორში.

8. ჯგუფი EOS - Urban Signs

ჯგუფი 2012 წელს შეიქმნა და ალტერნატიული ნიუ მეტალის, არტ როკისა და ექსპერიმენტალურ ჟანრებში ქმნის მუსიკას.

9. დიმა კობეშავიძე - Scream

დიმა მონაწილეობდა ახალ ხმაში და X ფაქტორში.

10. ტრიო მანდილი - მე და შენ

ტრიო მანდილი მას შემდეგ გახდა პოპულარული, რაც ინტერნეტში მათ მიერ განთავსებულმა ვიდეომ 4 მილიონზე მეტი ნახვა დააგროვა.

11. თაკო გაჩეჩილაძე - Keep the Faith

თაკო გაჩეჩილაძეს უკვე დიდი ხანია იცნობს ქართველი მსმენელი. აღსანიშნავია, რომ 2011 წელს მან მონაწილეობა მიიღო MTV Europe-ის კონცერტში. ის პროექტ ერთი-ერთშის გამარჯვებულიცაა.

12. ნინო ბაშარული - ლილეო

2009 წელს ნინო ბაშარული პროექტ ჯეოსტარში მონაწილეობდა.

13. ელენე მიქიაშვილი - Fighter

ელენე 2015 წელს პროექტ ახალ ხმაში მონაწილეობდა.

14. MISHO - Magic

მიშოს კლასიკური მუსიკალური განათლება აქვს. ის აქტიურად იყო ჩართული მუსიკალურ პროექტებში: ვარსკვლავების აკადემია, X ფაქტორი, ბრავო, ოქროს ტალანტი და ნუცას სკოლა.

15. მარიკო ლეჟავა - Light it Up

მარიკო ლეჟავა მაყურებელს პროექტ საქართველოს ვარსკვლავიდან ახსოვს.

16. ჯგუფი The Mins - Crime

ჯგუფი The Mins 2011 წელს შეიქმნა და ახლა ის ევროვიზიის ეროვნული ფინალის ერთ-ერთი კონკურსანტია. საინტერესოა რომ მუსიკოსი Moby ევროვიზიის ეროვნულ კონკურსში სწორედ The Mins-ს უჭერს მხარს.

17. ჯგუფი Sparkle - On The Top

ამ გოგონებმა ერთმანეთი ახალ ხმაში გაიცნეს და მოგვიანებით გადაწყვიტეს პროექტ X ფაქტორისთვის ჯგუფი SPARKLE შეექმნათ.

18. თორნიკე ყიფიანი - You Are My Sunshine

თორნიკე 2016 წელს X ფაქტორის გამარჯვებული გახდა და მას უამრავი თაყვანისმცემელი ჰყავს.

19. თემო საჯაია - All The Same

თემო 2004 წელს მონაწილეობდა სატელევიზიო კონკურსში ნუცას სკოლა, 2009 წელს კი ვარსკვლავების აკადემიის ფინალისტი იყო.

20. საბინა ჭანტურია - Stranger

მომღერალ საბინა ჭანტურიას საკმაოდ წარმატებული მუსიკალური კარიერა აქვს შვედეთში.

21. მარიამ ჩაჩხიანი - Fly

მარიამ ჩაჩხიანი 2006 წელს საბავშვო ევროვიზიის შესარჩევ კონკურსში მონაწილეობდა.

22. ჯგუფი Asea Sool - Nature

ჯგუფი Asea Sool და-ძმა ბექა და ათინა ჯანუაშვილებმა 2011 წელს შექმნეს.

23. ნანუკა გიორგობიანი - Let The Sunshine In

ნანუკა 2016 წლიდან ჯგუფ ჯეო პლანეტის სოლისტია.

24. ოთო ნემსაძე & ჯგუფი Limbo - Dear God

ოთო ნემსაძე ორი მეგაშოუს, ჯეოსტარისა და ბრავოს გამარჯვებულია.

25. დავით შანიძე - მტვერის კაცი

დავით შანიძე ეთნო-ჯაზ ჯგუფის, შინ-ის ფოლკლორული ნაწილის ხელმძღვანელია.