FX-ის ერთ-ერთი ყველაზე წარმატებული სატელევიზიო სერიალი American Horror Story კიდევ ორი სეზონით განახლდა, ამის შესახებ ჟურნალისტებს კომპანიის აღმასრულებელმა დირექტორმა, ჯონ ლანდგრაფმა განუცხადა.

"რაიანი და ბრედი [იგულისხმება შოუს შემქმნელები - რაიან მერფი და ბრედ ფალჩუკი] არაჩვეულებრივი სცენარისტები არიან, რომლებმაც კარგად იციან საკუთარი საქმე. მათი სერიალი ჩვენი არხის ერთ-ერთი მთავარი მონაპოვარია. AHS (ამერიკული საშინელებათა ისტორია) ერთდროულად არის საინტერესო, შოკისმომგვრელი და გასართობი. სწორედ ამიტომ გადავწყვიტეთ, რომ შოუს კიდევ ორი სეზონი გავიდეს ჩვენთან", - ამბობს ლანდგრაფი.

"როდესაც რაიანი და ბრედი 6 წლის წინ მოვიდნენ ჩვენთან ამ ამბიციური პროექტით, მაშინვე დავინტერესდით. იდეა იყო, რომ გაეკეთებინათ საშინელებათა ისტორიების ანთოლოგია, სადაც ყველა სეზონში ერთი და იგივე მსახიობები იქნებოდნენ, თუმცა განსხვავებულ ეპოქაში და როლში. ასეთი რამ მანამდე არავის ჰქონდა შექმნილი. მათ ექვსი, სრულიად განსხვავებული, ამაღელვებელი და საინტერესო სეზონი გვაჩუქეს, რომელთაც მილიონობით თაყვანისმცემელი უყურებდა მსოფლიოს მასშტაბით. მინდა ბრაიანს და ბრედს მივულოცო ეს მრავალწლიანი წარმატება. მადლობას ვუხდით ჯონ ლანდგრაფსაც, რომელიც თავიდანვე უჭერდა ამ იდეას მხარს. შოუ კიდევ ორი სეზონით განახლდა ჩვენს არხზე", - ამბობს FOX-ის სატელევიზიო ქსელის დირექტორი დანა ვალდენი.

American Horror Story სხვა სერიალებისგან იმით განსხვავდება, რომ თითოეული სეზონი დამოუკიდებელი სიუჟეტის მქონე მინისერიალს წარმოადგენს, თუმცა როგორც რაიან მერფი ამბობს, ყველა სეზონი ერთმანეთთან არის დაკავშირებული. სერიალის პირველი სეზონი 2011 წელს გავიდა ეთერში და მაშინვე დაიმსახურა სატელევიზიო კრიტიკოსებისაგან დიდი მოწონება. ჯესიკა ლანგმა კი არაჩვეულებრივი როლებისთვის ორი ემი და ერთი ოქროს გლობუსი მიიღო.