ტეილორ სვიფტმა აგვისტოში თავისი რიგით მერვე ალბომი Folklore გამოუშვა, რომელიც მომღერალმა კარანტინში ჩაწერა. იმასთან ერთად, რომ ფოლკლორმა ტეილორ სვიფტის კარიერაში ყველაზე დადებითი შეფასებები დაიმსახურა, ის წლის ერთ-ერთი ყველაზე წარმატებული ალბომიც აღმოჩნდა.

Billboard-ის ინფორმაციით, გასულ კვირაში აშშ-ში Folklore-ის 57 000 ასლი გაიყიდა და ამერიკაში გაყიდვების ჯამურმა მაჩვენებელმა 1,038 მილიონი შეადგინა, რითიც პირველი ალბომი გახდა, რომლის გაყიდვებმაც 2020 წელს მილიონ ერთეულს მიაღწია.

შემდეგ თვეში გრემის მომავალი დაჯილდოების ნომინაციები გამოქვეყნდება და როგორც ვარაუდობენ, ამ შედეგების გათვალისწინებით ტეილორ სვიფტი წლის ერთ-ერთი მთავარი ტრიუმფატორი იქნება.

აღსანიშნავია, რომ მომღერლის წინა ალბომი Lover ასევე ერთადერთი ჩანაწერი იყო, რომლის მილიონზე მეტი ასლი გაიყიდა 2019 წელს ამერიკაში.

30 წლის ტეილორ სვიფტმა ალბომი Folklore 23 აგვისტოს გამოაქვეყნა და მალევე დაიპყრო ერთგული მსმენელების გული, რითიც როგორც ამერიკის, ისე სხვადასხვა ქვეყნის მუსიკალური ჩარტების ლიდერი გახდა.

სექტემბერში სვიფტმა ახალი ალბომის წყალობით რეკორდიც მოხსნა: Billboard-ის ჩარტებში მისი ალბომები სულ 47 კვირის განმავლობაში ლიდერობდა, რითიც უიტნი ჰიუსტონის 46-კვირიანი შედეგი გააუმჯობესა — ჰიუსტონმა მეორე ადგილზე გადაინაცვლა, მესამე ადგილს კი ადელი იკავებს 34-კვირიანი მაჩვენებლით.

ივნისში ჟურნალმა ფორბსმა 2020 წლის ყველაზე მაღალანაზღაურებადი მომღერლების სია გამოაქვეყნა, სადაც ტეილორ სვიფტი ასევე ლიდერ ათეულში მოხვდა: $63,5 მილიონიანი შემოსავლებით ის მეშვიდე ადგილს იკავებს.

მოკლედ, თამამად შეგვიძლია ვთქვათ, რომ ბევრისთვის თუ არა, ქანთრისა და პოპის ამ შემსრულებლისთვის ნამდვილად წარმატებული და ნაყოფიერი აღმოჩნდა 2020 წელი.