გუშინ, 19 ოქტომბერს, ჩედვიკ ბოუზმენის ბოლო ფილმის, Ma Rainey’s Black Bottom-ის, პირველი ტრეილერი გამოვიდა, რომელშიც გარდაცვლილი მსახიობი შარვალ-კოსტიუმშია გამოწყობილი და ვაიოლა დევისთან ერთად ბლუზს ასრულებს.

ფილმი ოგუსტ უილსონის ამავე სახელწოდების პიესაზეა დაფუძნებული და ის მოგვითხრობს ნოვატორი ბლუზ-შემსრულებლის, მა რეინის, შესახებ, რომლის როლსაც დევისი ასრულებს. ფილმის მოვლენები 1927 წლის ჩიკაგოში მიმდინარეობს, სადაც მუსიკოსებს რასის, მუსიკის, ურთიერთობებისა და შავკანიანი ხელოვანების ექსპლუატაციის სირთულეებთან უწევთ შეჭიდება.

ბოუზმენი მას ბენდის წევრის, ლევის, როლს ასრულებს — ამბიციური მესაყვირის, რომელიც იმისკენ მიისწრაფის, რომ ძველებური სიმღერების გათანამედროვებით ჩიკაგოს მუსიკალურ სცენაზე საკუთარი კვალი დატოვოს. იხილეთ ფილმის პირველი ტრეილერი:

ფილმის რეჟისორი ჯორჯ კ. ვულფია, რომელმაც პიესა Angels in America: Millennium Approaches-ისა და მიუზიკლ Bring in ‘da Noise, Bring in ‘da Funk-ის გადაღებისთვის ტონის ჯილდო მოიპოვა.

ფილმის სხვა მსახიობებს შორის არიან გლინ ტურმანი, კოლმან დომინგო და მაიკლ პოტსი. ფილმის სცენარისტი რუბენ სანტიაგო-ჰადსონია, მისი პროდიუსერები კი — როდ ბლექი, დენზელ ვაშინგტონი და დენი ვულფი.

როგორც ოჯახმა მისი გარდაცვალების შემდეგ გაამხილა, ბოუზმენს 2016 წელს მე-3 სტადიის ნაწლავის კიბო დაუდგინდა, რაც საბოლოოდ მე-4 სტადიაში გადაიზარდა. მართალია, ის საკუთარ დიაგნოზზე არასდროს საუბრობდა, თუმცა მთელი ეს წლები კარიერის პარალელურად მკურნალობდა.

Netflix-ს შეუძლია, მეორეხარისხოვანი როლის კატეგორიაში ბოუზმენის ოსკარზე წარდგენაზე იზრუნოს. გარდაცვლილმა მსახიობმა შეიძლება კიდევ ერთი ნომინაცია მოიპოვოს სპაიკ ლისა და ნეტფლიქსის Da 5 Bloods-ით; თუკი ის ორჯერ ნომინირდება, ბოუზმენი გახდება პირველი მსახიობი, რომელმაც გარდაცვალების შემდეგ ორი ნომინაცია მოიპოვა.

Ma Rainey’s Black Bottom ნეტფლიქსზე 18 დეკემბერს გამოვა.

ამავე თემაზე: