ბათუმ-ახალციხის საავტომობილო გზაზე, ზღვის დონიდან 1180 მეტრზე მდებარეობს სოფელი დიოკნისი, რომელიც ხულოს მუნიციპალიტეტს ეკუთვნის. დაახლოებით 9 წლის წინ, ანუ მაშინ, როცა ადგილობრივები ჯერ კიდევ წინაპრების მიერ დატოვებულ მეურნეობებს უვლიდნენ, გურამ ძირკვაძემ გადაწყვიტა ვაზის კულტურის პარალელურად (იგი ფლობს 15 ჯიშის ყურძენს), გაეშენებინა კენკროვანი კულტურა. თავდაპირველად მის წამოწყებას ყველა ეჭვის თვალით უყურებდა, რადგან ხულოს მუნიციპალიტეტში არ იყო მსგავსი კულტურის მოვლა-მოყვანის დიდი ტრადიცია, შესაბამისად ეს მიმართულება სიახლეს წარმოადგენდა. ბატონმა გურამმა კი ევროკავშირის პროექტთან თანამშრომლობის შემდეგ გადაწყვიტა გაერისკა. იგი ჩაერთო ხულოს ადგილობრივი განვითარების ჯგუფის (LAG) მიერ გამოცხადებულ პროექტში, მიიღო გრანტი, კონსულტაცია და ტექნიკური დახმარება, უამრავი სირთულე შრომით გადალახა და დღეს მას ქვეყანაში ხარისხიანი კენკროვანი კულტურის მწარმოებლად იცნობენ.

ბატონი გურამის ჟოლოს ბაღი ერთ-ერთია ხულოს ადგილობრივი განვითარების ჯგუფის მიერ ამ ეტაპზე დაფინანსებული 73 ინიციატივიდან. LAG-მა ბოლო სამი წლის განმავლობაში რეგიონის ეკონომიკური თუ სოციალური ცხოვრება თავდაყირა დააყენა.

ძირკვაძეების ოჯახმა საქმიანობის საწყის ეტაპზევე გააცნობიერა, რომ საჭირო იყო ამ საქმიანობაში სხვა ადამიანების ჩართვა, რადგან მაღალმთიანი აჭარის კლიმატი საშუალებას იძლევა ნაკლები დანახარჯითა და ჩარევით მიეღო ხარისხიანი მოსავალი. შესაბამისად, მათ დაიწყეს ნერგების გაცემა და ამით თანასოფლელებს საქმიანობის წამოწყებაში შეუწყვეს ხელი. დღეს, ბატონი გურამის და ხულოს LAG-ის მხარდაჭერით ამ ბიზნესში 48 ადგილობრივი ოჯახია დასაქმებული.

ევროკავშირის მხარდაჭერით დაფინანსებული პროექტის ფარგლებში, ადგილობრივი განვითარების ჯგუფის ჩართულობით ნაკვეთზე ასევე მოეწყო სარწყავი სისტემა, რომელიც რესურსების ოპტიმიზაციისთვის აუცილებელია. როგორც ოჯახი ამბობს, წელს მინიმუმ 20 ტონამდე კენკროვანის რეალიზებას მოახდენენ, რითაც მთლიან აჭარას მოამარაგებენ. ძირკვაძეები სიამაყით ამბობენ, რომ მომხმარებელს საუკეთესო ხარისხის კენკროვან კულტურებს სთავაზობენ, რაშიც დიდი როლი ევროკავშირის პროექტს მიუძღვის – ბატონი გურამი დარწმუნებულია, რომ LAG-ის გარეშე საქმიანობა ასე მარტივად ვერ აეწყობოდა, შესაბამისად, საშუალებაც არ ექნებოდა დაესაქმებინა სხვა ადამიანები.

თავის მხრივ, LAG-ში მოხარულები არიან, რომ ადგილობრივი ბიზნესის ხელშეწყობაში წვლილი მათაც მიუძღვით. "გურამ ძირკვაძე მნიშვნელოვან საქმეს აკეთებდა და აკეთებს მუნიციპალიტეტისთვის. გარკვეულ ეტაპზე ის საჭიროებდა ხელშეწყობას, სწორედ ამ მიზნით ჩაერთო იგი პროექტში, გაიარა საგრანტო კონკურსით გათვალისწინებული ეტაპები და მიიღო დაფინანსება. ჩვენ შედეგად მივიღეთ არამხოლოდ ერთი გაძლიერებული ოჯახი, არამედ უამრავი შემოსავლის მქონე ადამიანი, რომელთაც არ უწევთ სარჩოს საძებნელად მრავალი ათეული თუ ათასეული კილომეტრის გავლა", — გვიყვება ასლან ტუნაძე.

ძირკვაძეების ოჯახისთვის მნიშვნელოვანია არამხოლოდ წარმოებული პროდუქტი, არამედ ცხოვრების სტილის შეცვლა და ადგილობრივი მოსახლეობის ეკონომიკური გაძლიერება. როგორც ოჯახში ამბობენ, ევროკავშირის მიერ მრავალწლიანი ხელშეწყობის საფუძველზე, მოსახლეობა დარწმუნდა, რომ შეუძლია საკუთარ ქვეყანაში დასაქმდეს და ღირსეული შემოსავალი მიიღოს.

LAG არის სოციალური პლატფორმა, რომელიც აერთიანებს ადგილობრივი
საზოგადოების (საჯარო, კერძო და სამოქალაქო სექტორების) წარმომადგენლებს. იგი შეიმუშავებს ადგილობრივი განვითარების სტრატეგიას და ახორციელებს მრავალფეროვან სოციალურ-ეკონომიკურ საქმიანობას ადგილობრივი საზოგადოების სასარგებლოდ.

LAG-ის საქმიანობა ადგილობრივი მოსახლეობის ხედვას, ენერგიას და ჩართულობას ეფუძნება.

ევროკავშირის მხარდაჭერით ადგილობრივი განვითარების ჯგუფები უკვე 12 მუნიციპალიტეტშია ჩამოყალიბებული, ესენია: ლაგოდეხი, ბორჯომი, ყაზბეგი, თეთრიწყარო, ახალქალაქი, დედოფლისწყარო, ქედა, ხულო, წალკა, ახმეტა, წყალტუბო და მესტია. საერთო ჯამში, დღემდე, ევროკავშირის მხარდაჭერით LAG-ების მიერ დაფინანსდა სოფლის განვითარების 500-ზე მეტი ინიციატივა სოფლის მეურნეობის, ტურიზმის, სოციალური და სოფლის ინფრასტრუქტურისა და გარემოს დაცვის მიმართულებით.

შედეგად, დასაქმების შესაძლებლობები გაუჩნდა სოფლად მცხოვრებ 1000-ზე მეტ ოჯახს, ხოლო საარსებო პირობები სოფლად მცხოვრებ 10 000-ზე მეტ ადამიანს გაუუმჯობესდა. თუმცა, ადგილობრივი განვითარების ჯგუფები ბევრად მეტია ვიდრე კონკრეტული ციფრები – ისინი სოფლად მცხოვრები ადამიანების ხედვას, ენერგიას და ჩანაფიქრებს უყრიან თავს და საზოგადოებას სოფლის განვითარების საერთო მიზნის ქვეშ აერთიანებენ.

დამატებითი ინფორმაციისთვის იხილეთ კამპანიის ვებგვერდი და ფაქტები და მონაცემები.