ჯანდაცვის მინისტრმა, ეკატერინე ტიკარაძემ განაცხადა, რომ არსებული ეპიდემიოლოგიური ვითარებიდან გამომდინარე თბილისში, დინამო არენაზე ევროპის ჩემპიონატის საკვალიფიკაციო ეტაპის პლეი-ოფის ნახევარფინალური შეხვედრაზე მაყურებლის დასწრება რეკომენდებული არ არის. საქართველოს ნაკრები ბელარუსს 8 ოქტომბერს უნდა დაუპირისპირდეს.

"ჩვენ ვისაუბრეთ რისკებთან დაკავშირებით. 8 რიცხვამდე საბჭო კიდევ ერთხელ შეიკრიბება და საბოლოო გადაწყვეტილება იქნება ცნობილი. ჩვენ რეკომენდაცია მივეცით, რომ ამ ეპიდსიტუაციიდან გამომდინარე მატჩის გამართვა რეკომენდირებული არ არის", — განაცხადა ტიკარაძემ დღეს, ხუთ ოქტომბერს მთავრობის საკოორდინაციო საბჭოს დასრულების შემდეგ გამართულ ბრიფინგზე.

დაავადებათა კონტროლის ეროვნული ცენტრის ხელმძღვანელის, ამირან გამყრელიძის თქმით, მატჩი მაყურებლის გარეშე უნდა ჩატარდეს.

30 სექტემბერს საქართველოს ფეხბურთის ფედერაციამ განაცხადა, რომ 8 ოქტომბერს, თბილისში დინამო არენაზე ევროპის ჩემპიონატის საკვალიფიკაციო ეტაპის პლეი-ოფის ნახევარფინალური შეხვედრა გაიმართება.

2 ოქტომბერს კი ფედერაციაში საქართველო-ბელარუსის ანულირებული ბილეთების თანხის დაბრუნების პროცესის დაწყების შესახებ განაცხადეს.