ბილეთი დაჯავშნილია: ტომ კრუზი 2021 წელს კოსმოსში გაემგზავრება, რათა იმ ფილმის შექმნაში მიიღოს მონაწილეობა, რომელიც კოსმოსში გადაღებული პირველი მხატვრული სრულმეტრაჟიანი კინოსურათი იქნება.

ამის შესახებ ინფორმაცია პირველად ჯერ კიდევ მაისში გავრცელდა: ტომ კრუზი ილონ მასკის კომპანია SpaceX-თან და ნასასთან თანამშრომლობით ამბიციური პროექტის განხორციელებას გეგმავს. ამ ცნობილ მსახიობთან ერთად ფილმის შექმნაში მონაწილეობას მიიღებს რეჟისორი დაგ ლაიმანი, რომელსაც აქამდე ისეთი ცნობილი კინოსურათები გადაუღია, როგორებიცაა Mr. & Mrs. Smith და Edge of Tomorrow.

რამდენიმე დღის წინ კი ოფიციალურად დადასტურდა, რომ ტომ კრუზი რეჟისორ დაგ ლაიმანთან ერთად 2021 წლის ოქტომბერში კოსმოსური ხომალდით გაფრინდება.

მაისში ნასას ადმინისტრატორმა ჯიმ ბრაიდენსტაიმა განაცხადა, რომ ისინი მოხარულები არიან, ამ პროექტში ჩართვის შესაძლებლობა რომ მიეცათ:

"გვჭირდება, რომ პოპულარულმა მედიამ ინჟინერებისა და მეცნიერების ახალი თაობა შთააგონოს, რათა ნასას ამბიციური გეგმები რეალური გახდეს", — ვკითხულობთ მის მიერ გამოქვეყნებულ პოსტში.

ჯერჯერობით უცნობია მომავალი ფილმის სახელწოდება და სიუჟეტის დეტალები, თუმცა მედიაში გავრცელებული ინფორმაციის თანახმად, კინოკომპანია Universal-მა მის წარმოებაზე დაახლოებით 200 მილიონი დოლარი გამოყო.