დავით ფურცხვანიძე, რომელმაც თამარ ბაჩალიაშვილის ოჯახის ადვოკატს სატელიტის ფოტოები მიაწოდა, მაგისტრი მოსამართლის თანდასწრებით გამოკითხვას ითხოვს. ამის შესახებ მან მას შემდეგ განაცხადა, რაც საგამოძიებო უწყება დატოვა, სადაც გამოსაკითხად იყო დაბარებული.

"იმიტომ, რომ არის ძალიან ოფიციალური მიდგომა, არის ჩხრეკა, არის ამოღება და მინდა, რომ მაქსიმალურად იყოს ყველაფერი სამართლებრივად დაცული", — განუცხადა მან ჟურნალისტებს.

ფურცხვანიძემ დღეს დაადასტურა, რომ ადვოკატ მიხეილ რამიშვილს სატელიტის ფოტოები თავად მიაწოდა. მისი თქმით, ის ანალიტიკური სააგენტოს ხელმძღვანელია და ფოტოები შემთხვევით არ ჩავარდნია ხელში. როგორც ის აღნიშნავს, ეს იყო კონკრეტული გამოძიების ფარგლებში, რომელსაც თავად ატარებს, თუმცა არა ბაჩალიაშვილის საქმეზე — "უფრო დიდ საქმეზე, რომელიც დიდ ფინანსური მაქინაციებს უკავშირდება".

ამის შესახებ მან TV პირველის ეთერში ისაუბრა და აღნიშნა, რომ პროკურატურის მიერ გავრცელებულ ინფორმაციას, რომლის თანახმადაც ფოტოები ყალბია, დასაბუთება სჭირდება. ფურცხვანიძის თქმით, პროკურატურა, როგორც სახელმწიფო სტრუქტურა, უნდა იყოს მზად, რომ როგორმე მოიპოვოს სატელიტური ფოტოები.

"სულ მცირე, ეს არის არაკორექტული ფორმულირება, რომ გაყალბებულია, მაგრამ ეს ჩემი საქმე არ არის. მნიშვნელოვანია, ჩვენ რას ვიკვლევთ — ფოტოების ხარისხსა და წარმომავლობის ნამდვილობას, თუ იყო თუ არა მანქანა იქ. თუ აქ პრიორიტეტებს დავალაგებთ, ყველაფერი ცხადი გახდება", — განაცხადა მან.

პროკურატურის ინფორმაციით, თამარ ბაჩალიაშვილის ოჯახის ადვოკატის, მიხეილ რამიშვილის მიერ გავრცელებული სატელიტის ფოტოებზე სამართლებრივი რეაგირება ექნებათ. როგორც უწყებაში აცხადებენ, ექსპერტიზით დადგინდა, რომ ფოტოები დამონტაჟებული და ყალბია.

"ვინაიდან სახეზეა გამოძიების და საზოგადოების მიზანმიმართულად შეცდომაში შეყვანის მცდელობა, ასევე მტკიცებულებების ფალსიფიკაცია, ფაქტზე შესაბამისი სამართლებრივი რეაგირება მოხდება", — აცხადებენ უწყებაში.

როგორც ბრიფინგზე განაცხადეს, ამ ეტაპზე ვინმეს მიმართ სისხლის სამართლებრივი დევნის დაწყებაზე საუბარი არაა და იგეგმება საგამოძიებო მოქმედებების ჩატარება.

8 სექტემბერს რამიშვილმა განაცხადა, რომ სატელიტის კადრებით დგინდება, რომ 19-20 ივლისს ბაჩალიაშვილის მანქანა ავტობანთან ახლოს, მინდორზე, ანუ იქ, სადაც იგი იპოვეს, არ იდგა.

ვინ არის დავით ფურცხვანიძე

მითების დეტექტორის ინფორმაციით, დავით ფურცხვანიძე არის იმ კომპანიის მფლობელი, რომელმაც გამოსცა წიგნი "ვლადიმერ პუტინი-თანამედროვე კაცობრიობის უმაღლესი ლიდერი". მათივე ცნობით, დავით ფურცხვანიძე არის ანალიტიკური სააგენტო უსაფრთხოების პრობლემების ანტიკრიზისული ცენტრის ხელმძღვანელი და მის სახელზე ბიზნეს რეესტრში რეგისტრირებულია სპუტნიკ ტვ, რომლის 100%-იანი წილის მფლობელი თავადაა.

მითების დეტექტორი წერს, რომ ფურცხვანიძეს 2014 წელს მონაწილეობა აქვს მიღებული კრემლთან დაკავშირებული ევრაზიული კვლევის ინსტიტუტის და გორჩაკოვის ფონდის გამართულ მრგვალ მაგიდაში. 2018 წელს კი ის პრორუსულ გამოცემა საქართველო და მსოფლიოსთან ინტერვიუში აცხადებდა, რომ სკრიპალები ბრიტანეთის სპეცსამსახურებმა მოწამლეს, ამასთანავე აცხადებდა, რომ დასავლეთი საქართველოს პატრიარქის მცდელობებს ბლოკავს, რაც რუსეთთან ურთიერთობის მოგვარებას ისახავს მიზნად.