ამ კვირის დასაწყისში ცნობილი გახდა, რომ 21 სექტემბერს ელენის შოუ მე-18 სეზონით დაუბრუნდება მაყურებელს. გავრცელებულ პრესრელიზს ერთვის 62 წლის წამყვანის კომენტარიც: "ერთი სული მაქვს, როდის დავუბრუნდები სამუშაოს და ჩვენს სტუდიას. და, დიახ, ჩვენ ამ ყველაფერზე ვილაპარაკებთ".

რამდენიმე თვის წინ ცნობილი ამერიკელი ტელეწამყვანი, ელენ დეჯენერესი, სკანდალში გაეხვა. ყოფილი თანამშრომლები ელენ დეჯენერესის შოუს და მის პროდიუსერებს რასიზმსა და ტოქსიკური სამუშაო გარემოს შექმნაში ადანაშაულებდნენ. ბრალდებების გახმაურების შემდეგ საქმის შესწავლა გადაწყვიტა შოუს დისტრიბუტორმა კომპანიამ, WarnerMedia-მ. ამის შემდეგ კი თანამშრომლებს საჯაროდ მოუბოდიშა თავად ელენმა:

"ჩვენი გადაცემის პირველ დღეს, შეხვედრაზე, ყველას ვუთხარი, რომ ელენ დეჯენერესის შოუ ბედნიერების ადგილი იქნებოდა — ადგილი, სადაც ხმის ტონს არავინ აუწევდა და ერთმანეთს ყველა პატივისცემით მოეპყრობოდა. როგორც ჩანს, რაღაც შეიცვალა. იმედგაცრუებული ვარ იმის შეტყობით, რომ ასე არ მოხდა. ამის გამო ბოდიშს გიხდით. ყველამ, ვინც მიცნობს, იცის, რომ ეს იმის საპირისპიროა, რისიც მწამს და რაც ჩემი გადაცემისთვის მსურდა", — აცხადებდა ემის მფლობელი სატელევიზიო შოუს წამყვანი.

ფოტო: NBC

აგვისტოში გადაცემის სამი პროდიუსერი დაითხოვეს. მოგვიანებით, გავრცელდა ხმები, რომ ელენის შოუ, შესაძლოა, ზაფხულის შესვენებიდან ეკრანზე აღარ დაბრუნებულიყო და სამუდამოდ დახურულიყო. თუმცა, როგორც ჩანს, ეს ინფორმაცია სიმართლეს არ შეესაბამება.

აპრილის შემდეგ გადაცემის ჩაწერებმა სტუდიიდან სახლში გადაინაცვლა, თუმცა, როგორც ცნობილი გახდა, ახალი სეზონი კვლავ სტუდიიდან გაგრძელდება, ამჯერად — კორონავირუსის პანდემიის გამო — აუდიტორიის გარეშე.

შოუს მე-18 სეზონის პრემიერაზე სტუმრად ვიხილავთ ამერიკელ მსახიობსა და კომიკოსს, ტიფანი ჰადიშს. ასევე კერი ვაშინგტონს, ალეკ ბოლდუინს და კრისი ტიგენს. გარდა ამისა, თვის ბოლომდე პოპულარულ შოუს ეწვევიან კრის როკი, ემი შუმერი, ადამ სენდლერი და ორლანდო ბლუმიც.