გასულ კვირას ცნობილი გახდა, რომ 2021 წლიდან ბერლინის კინოფესტივალზე ნომინაციები გენდერულად ნეიტრალური იქნება. ამ ცვლილებამ კინომოყვარულებსა და საზოგადოებაში არაერთგვაროვანი რეაქცია გამოიწვია.

ამ გადაწყვეტილების საპასუხოდ, ავსტრალიელმა მსახიობმა, ქეით ბლანშეტმა, განაცხადა, რომ იგი ყოველთვის "უბრალოდ, მსახიობი" იყო გენდერის დაკონკრეტების გარეშე.

რამდენადაც ინგლისურ ენაში სიტყვა "მსახიობი" განსხვავდება სქესის მიხედვით, ქეით ბლანშეტს, რომელიც წლეულს ვენეციის კინოფესტივალის ჟიურის ხელმძღვანელია, ბიენალეს გახსნის დღეს, პრეს-კონფერენციაზე ჰკითხეს, თუ რას ფიქრობდა ბერლინალეს დირექტორების მიღებულ გადაწყვეტილებაზე.

"ეს პოლიტიკური განცხადება არაა, თუმცა საკუთარ თავზე საუბრისას ყოველთვის ვამბობ, რომ, უბრალოდ, 'მსახიობი' ვარ", — განაცხადა ბლანშეტმა, — "არ მგონია, რომ ჩვენს ენაში გენდერი ხშირად კონკრეტდება, თუმცა ჩემს თაობას იმ დროს ცხოვრება მოუხდა, როცა 'მსახიობი ქალი' დამამცირებელი მნიშვნელობით გამოიყენებოდა. ამდენად, ჩემი აზრით, მე განსხვავებულ განაცხადს ვაკეთებ".

ბლანშეტის თქმით, "კარგი შესრულება კარგი შესრულებაა" და ბევრად რთულია, სხვა ხელოვანის ნამუშევრის შეფასება გიწევდეს.

"ვფიქრობ, ეს ზოგჯერ ყველაზე რთული საქმეა", — ამბობს იგი, — "ორი ნამუშევრის შეფასება და გამიჯვნა".

ვენეციის წლევანდელ კინოფესტივალზე ტილდა სუინტონმა ოქროს ლომი სამსახიობო კარიერაში მიღწეული განსაკუთრებული წარმატებისთვის მიიღო.

ფოტო: Domenico Stinellis

ბლანშეტის თანამედროვე მსახიობი, ტილდა სუინტონი, მას ეთანხმება.

"უაზრო დროის ფლანგვაა. ცხოვრება კი მეტისმეტად მოკლეა ამისთვის", — ამბობს სუინტონი The Guardian-ის ცნობით, — "ამიტომ მიხარია ბერლინალეს ამბის შეტყობა. ვფიქრობ, ამ გადაწყვეტილების მიღება გარდაუვალი იყო და სხვებიც მათ მიბაძავენ. ჩემთვის ეს ნათელია".