შრომის პირობების ინსპექტირების დეპარტამენტის უფროსის, ბექა ფერაძის განცხადებით, საბავშვო ბაღებში მშობლების შესვლა აიკრძალება. მისივე თქმით, ბავშვის მიღება და შემდგომი პროცედურები ბაღის თანამშრომლის მიერ მოხდება.

ასევე, ფერაძის განცხადებით, გამოყოფილი უნდა იყოს შესაბამისი იზოლაციის ოთახი იმ შემთხვევაში, თუ რომელიმე აღსაზრდელს ან მომუშავე პერსონალს ტემპერატურა დაუფიქსირდება. პერსონალისთვის ბავშვებთან ურთიერთობის შესაბამისი სწავლების ჩატარებაც იგეგმება.

"წესდება, ასევე, შეზღუდვები ბავშვის გამოყვანასთან დაკავშირებით. მშობელმა დაწესებულებიდან ბავშვის გამოყვანის თაობაზე მინიმუმ 10 წუთით ადრე უნდა დარეკოს ბაღის შესაბამის წარმომადგენელთან. ბავშვების რაოდენობა თითოეულ ჯგუფში დაბალანსებული უნდა იყოს", — განაცხადა ფერაძემ უწყებათაშორის საკოორდინაციო საბჭოს სხდომის დასრულების შემდეგ გამართულ ბრიფინგზე.

გარდა ამისა, განსაზღვრულია შესაბამისი რეკომენდაციები ჭურჭლის რეცხვასთან დაკავშირებით. ჭურჭელი 37 º-ზე უნდა გაირეცხოს.

აგრეთვე, იკრძალება სათამაშოების სახლიდან წაღება. აკრძალულია ისეთი სათამაშოს გამოყენება, რომლის დეზინფექცია რთულად ხდება. ფერაძის განმარტებით, ბაგა-ბაღებში აუცილებელ შეზღუდვებთან და რეკომენდაციებთან დაკავშირებით დეტალურ პროტოკოლს მიმდინარე კვირაში გამოაქვეყნებენ.

მისივე განცხადებით, შრომის ინსპექცია როგორც სკოლების, ასევე, ბაღების შემოწმებას იწყებს და მათი ფუნქციონირების განახლება ჯანდაცვის სამინისტროს მიერ გაცემული დადებითი დასკვნის საფუძველზე მოხდება.

საკოორდინაციო საბჭოს გადაწყვეტილებით, დღეს, 26 აგვისტოს გახდა ცნობილი, რომ სასწავლო პროცესი სკოლებში 15 სექტემბრიდან, საბავშვო ბაღებში კი ორი კვირის ინტერვალის შემდეგ, პირველი ოქტომბრიდან განახლდება.

საქართველოში სკოლებსა და ბაგა-ბაღებში სწავლა კორონავირუსის შემთხვევის დაფიქსირების შემდეგ, მარტიდან დისტანციურ რეჟიმში მიმდინარეობდა.

ასევე წაიკითხეთ: