მსოფლიოში ცნობილი ერთ-ერთი ყველაზე პოპულარული სატელევიზიო პროექტის — ელენ დეჯენერესის შოუს სამი მთავარი პროდიუსერი თანამდებობიდან გაათავისუფლეს.

ეს ინფორმაცია რამდენიმე საათის წინ შოუს მწარმოებელი კომპანიის, Warner Bros.-ის წარმომადგენელმა გაავრცელა.

ეს გადაწყვეტილება მას შემდეგ მიიღეს, რაც მედიაში გავრცელებული ყოფილი თუ ამჟამინდელი თანამშრომლების ბრალდებების გამო ასევე Warner Bros.-მა გადაცემის სამუშაო გარემოს შესწავლა და შესაძლო გადაცდომების გამოძიება დაიწყო.

BBC-ის ცნობით, ელენის შოუდან დაითხოვეს აღმასრულებელი პროდიუსერები ედ გლევინი, კევინ ლიმენი და ჯონათან ნორმანი.

პროდიუსერებმა ედ გლევინმა (მარცნიდან მეორე) და კევინ ლიმენმა (მარჯვნივ) ბრალდებები უარყვეს, ჯონათან ნორმანს კი ამ საკითხზე საჯაროდ ჯერ არ უსაუბრია.

ფოტო: GETTY IMAGES

ამ წლის დასაწყისში სხვადასხვა დროს უცხოურ მედიაში თანამშრომლების განცხადებები გავრცელდა, რომლითაც ისინი ელენის შოუს ხელმძღვანელობას "ტოქსიკური გარემოს" შექმნაში ადანაშაულებდნენ.

მათ შორის ედ გლევინი და ჯონათან ნორმანი ყოფილმა თანამშრომლებმა სექსუალურ შევიწროებაში დაადანაშაულეს. ისინი ასევე აღნიშნავდნენ, რომ პროდიუსერები თანამშრომლებს ხშირად აშინებდნენ და მტრულ გარემოს უქმნიდნენ.

აპრილში Variety-მ გაავრცელა ინფორმაცია, რომ შოუს ხელმძღვანელები დანარჩენ თანამშრომლებს სტრესულ გარემოს უქმნიდნენ: მათ ისიც კი არ იცოდნენ, აიღებდნენ თუ არა ხელფასს პანდემიის გამო.

რამდენიმე კვირის წინ კი BuzzFeed News-მა გამოაქვეყნა სტატია, რომელშიც ელენის შოუს 10 ყოფილი თანამშრომელი მათ წინააღმდეგ მიმართულ რასიზმზე საუბრობდა და დასძენდა, რომ ემის მფლობელი ტელეშოუს კულისებს მიღმა შიში და დაშინება არსებობდა. შავკანიანი თანამშრომლები აღნიშნავდნენ, რომ მათ ხშირად უწევდათ რასისტული კომენტარების ატანა: მაგალითად, ერთ-ერთმა ყოფილმა თანამშრომელმა განაცხადა, რომ შოუს სცენარისტს მისი სახელი იმიტომ არ ახსოვდა, რომ "მხოლოდ თეთრკანიანი თანამშრომლების სახელები ამახსოვრდებოდა".

ამის შემდეგ შოუში სამუშაო გარემოს შიდა გამოძიება დაიწყო, ელენ დეჯენერესმა კი თანამშრომლებს ბოდიში მოუხადა:

"ჩვენი შოუს გასვლამდე, თანამშრომლებს პირველ შეხვედრაზე ვუთხარი, რომ ელენ დეჯენერესის შოუ ბედნიერების ადგილი უნდა ყოფილიყო. ადგილი, სადაც არავინ აიმაღლებდა ხმის ტონს, ერთმანეთს ყველა მოექცეოდა პატივისცემით. აშკარაა, რომ რაღაც შეიცვალა და იმედგაცრუებული ვარ იმის გაგებით, რომ ასე არ მოხდა. ამის გამო, ბოდიშს გიხდით."

სოციალურ ქსელებში ათასობით მომხმარებლის კრიტიკის მიუხედავად, ელენ დეჯენერესს ისეთმა ცნობილმა სახეებმა დაუჭირეს საჯაროდ მხარი, როგორებიც არიან კევინ ჰარტი, კეტი პერი, ალეკ ბოლდუინი და ეშტონ კაჩერი.