ამერიკულმა ბიზნეს ჟურნალმა, ფორბსმა, 2016 წელს პლანეტის ყველაზე გავლენიან ადამიანად რუსეთის პრეზიდენტი, ვლადიმერ პუტინი დაასახელა. უკვე მეოთხე წელია, პუტინი ამ პოზიციას ფორბსის რეიტინგში არავის უთმობს. "ის ყველაფერს იღებს, რაც სურს" – ასე მოკლედ აფასებს ფორბსი მიზეზს, რის გამოც რუსეთის პრეზიდენტი სიის სათავეში ხვდება.

როგორც ფორბსი წერს, რომ სირიაში, საკუთარ სამშობლოსა და აშშ-ს არჩევნებზე, პუტინმა ყველგან ის მიიღო, რაც რეალურად სურდა.

ამერიკული ჟურნალის პლანეტის ყველაზე გავლენიანი ადამიანების სიას სხვადასხვა კრიტერიუმებით ადგენს. სიის შედგენისას მნიშვნელოვანია, რა სახის ძალაუფლებას ფლობს ესა თუ ის პირი, რა ფინანსურ რესურსებზე მიუწვდება ხელი, რამდენ ადამიანზე აქვს გავლენა და ყველაზე მთავარი – რამდენად აქტიურად იყენებს თავის ძალაუფლებას მიზნების მისაღწევად.

ფორბსის მიხედვით, მსოფლიოში ყველაზე გავლენიანი ადამიანების ხუთეული ასე გამოიყურება:

  • ვლადიმერ პუტინი, რუსეთის პრეზიდენტი;
  • დონალდ ტრამპი, აშშ–ს არჩეული პრეზიდენტი;
  • ანგელა მერკელი, გერმანიის კანცლერი;
  • სი ძინპინი, ჩინეთის სახალხო რესპუბლიკის პრეზიდენტი და კომუნისტური პარტიის გენერალური მდივანი;
  • პაპი ფრანცისკე;

პოლიტიკოსებისა და რელიგიური ლიდერების გარდა, გავლენიან ადამიანთა სიაში არიან არიან ბიზნესმენები და ტერორისტული ორგანიზაციების ლიდერებიც. მაგალითად, ბილ გეიტსი ამ სიაში მე–7 ადგილზეა, მარკ ცუკერბერგი – მე–10. ტერორისტული ორგანიზაცია ისლამური სახელმწიფოს ლიდერმა, აბუბაქრ ალ ბაღდადიმ, გავლენიან ადამიანებში 57–ე პოზიცია დაიკავა. აშშ–ს ჯერ კიდევ მოქმედი პრეზიდენტი, ბარაკ ობამა, სტატუსისგან განსხვავებით, შედარებით მოკრძალებულ, 48–ე ადგილს დასჯერდა.