99 წლის ომის ვეტერანმა ქალმა, რომელიც გადაურჩა ნაცისტების მიერ მისი მკვლელობის მცდელობას, საშინელ ავიაკატასტროფასა და მკერდის კიბოს, ახლა კორონავირუსიც დაამარცხა.

ჯოი ენდრიუსს მომაკვდინებელი ვირუსი მაისში შეეყარა. ორი კვირის შემდეგ ის უკვე ექიმების განსაკუთრებული მეთვალყურეობის ქვეშ გადავიდა.

ჯოის მდგომარეობა იმდენად მძიმე იყო, რომ მისი 57 წლის შვილი მიშელი "გამოსამშვიდობებელი სიტყვის" სათქმელადაც კი ესტუმრა.

მიუხედავად ამისა, ბოლო კვირებისა და თვეების განმავლობაში ექიმები დაუჯერებელი რამის მომსწრენი გახდნენ: ჯოიმ ომისდროინდელ სულისკვეთებას მოუხმო და COVID-19 "სასწაულებრივად დაამარცხა".

ჯოი ენდრიუ (მარცხნივ)

ფოტო: SWNS

ჯოი, რომელსაც დემენციაც სჭირს, გამოჯანმრთელებას ახლა მეგობრებისა და ოჯახის გარემოცვაში აგრძელებს შინ. 22 ნოემბერს მას 100 წელი შეუსრულდება.

"დედაჩემი ყოველთვის ძალიან ძლიერი ქალი იყო. ის ყველაფერს თავისებურად აკეთებს, როგორც მისი თაობის ომგამოვლილ ხალხს სჩვევია ხოლმე. ეს თვისებები მას დღემდე აქვს და ვფიქრობ, სწორედ მათი მეშვეობით მოახერხა მან ბოლო თვეების გადალახვა. დედაჩემი კორონავირუსს ნამდვილად არ დაამარცხებინებდა თავს. სამწუხაროდ, დემენცია იმის საშუალებას არ აძლევს, რომ თავისი ამ მიღწევის შესახებ გაიგოს. თუმცა, მის გამოჯანმრთელებას მთელი ოჯახი ვზეიმობთ", — ამბობს მიშელი.

ჯოი ჩრდილოეთ ლონდონში დაიბადა და გაიზარდა 1920-იანებში, სანამ მეორე მსოფლიო ომის დროს ქალების დამხმარე საჰაერო ძალებს არ შეუერთდა სერჟანტად, სადაც ის ბრიტანეთის ბომბდამშენი ძალების სამხედრო მოქმედებებში მსახურობდა.

ჯოი ომის შემდეგ რაინის ბრიტანულ არმიას შეუერთდა და დიუსელდორფში გამწესდა, სადაც ის მოხუცებულ წყვილთან ერთად ცხოვრობდა, რომელსაც ძალიან დაუმეგობრდა, თუმცა მათ ნაცისტი შვილი ჰყავდათ.

მიშელის თქმით, გერმანიაში ყოფნისას ჯოის, რომელიც გერმანელი ებრაელების ოჯახიდან იყო, პირადი მძღოლი გამოეყო, რათა სურვილისამებრ წასულიყო ნებისმიერ ადგილას.

სწორედ ბერლინისკენ მოგზაურობისას იყო, რომ მძღოლმა, რომელიც ნაცისტი აღმოჩნდა, ჯოის მოკვლის მიზნით განზრახ მოაწყო ავარია.

ჯოიმ 1950-იან წლებში იქორწინა თავის ქმარზე, დეივიდ ენდრიუზე, რომელიც დიდი ბრიტანეთის საჰაერო ძალების ესკადრილიის ლიდერი იყო

ფოტო: SWNS

ამის შემდეგ ჯოი ერთ-ერთ პირველ სტიუარდესად შეუერთდა ბრიტანულ ავიაკომპანიას British Overseas Airways Corporation. ის იმ თვითმფრინავში იმყოფებოდა, რომელიც საწვავის გათავების გამო ჩამოვარდა ლიბიაში.

1950-იან წლებში ჯოიმ იქორწინა თავის ქმარზე, დეივიდ ენდრიუზე, რომელიც დიდი ბრიტანეთის საჰაერო ძალების ესკადრილიის ლიდერი იყო, 1963 წელს კი წყვილმა მიშელი იშვილა.

1970-იან წლებში ჯოიმ მკერდის კიბო დაამარცხა, მომავალი ათწლეულები კი დიასახლისად გაატარა. 2013 წელს მისი ქმარი დეივიდი გარდაიცვალა სიმსივნით.

მიშელი გეგმავს, რომ ამ წლის ბოლოსკენ ჯოის 100 წლის იუბილეს აღსანიშნავად ოჯახი შეკრიბოს.