Deepfake ახალი ტექნოლოგიაა, რომლის გამოყენებითაც ყალბი ვიდეოების და ფოტოების გაკეთება შეიძლება. ხშირად ეს საკმაოდ სახალისოა — მაგალითად, იხილეთ როგორ მღერის მილიარდერი ილონ მასკი საბჭოთა სიმღერას, "დედამიწა ილუმინატორში".

თუმცა ეს ტექნოლოგია საკმაოდ საშიშიცაა. Reuters-ის მიხედვით, ვიღაცამ Deepfake ტექნოლოგიის გამოყენებით ჟურანლისტის ყალბი პერსონა შექმნა, რომელმაც საერთაშორისო გამომცემლობებში, როგორებიცაა Jerusalem Post და Times of Israel, სტატიები გამოაქვეყნა.

ეს კარგად გვაჩვენებს, თუ რა მარტივია ოცდამეერთე საუკუნეში ყალბი ინფორმაციის გავრცელება ისე, რომ ყველაზე დაკვირვებულმა თვალმაც კი ვერ შეამჩნიოს.

ასევე იხილეთ:

"ჟურნალისტის" პროფილის მიხედვით, ოლივერ ტეილორი ბირმინგემის უნივერსიტეტის სტუდენტია, რომელსაც პოლიტიკა და ყავა უყვარს. თუმცა, ტეილორზე ინფორმაცია რეალობაში არ არსებობს. ის არც უნივერსიტეტის სტუდენტთა სიაში იძებნება, მისი ტელეფონის ნომერიც უცნობია და არც დაბადების მოწმობა მოიპოვება.

ტეილორის ფოტო იმავე ტექნოლოგიით არის გაყალბებული, რომელიც thispersondoesnotexist.com-ზე გამოიყენება. ამ საიტს არარსებული ადამიანების ფოტოების გენერირება შეუძლია.

ეს პირველი შემთხვევა არ არის, როდესაც გამომცემლობები არარსებული ჟურნალისტების სტატიებს აქვეყნებენ. The Daily Beast-ის კვლევის მიხედვით, აშშ-ის კონსერვატიულ მედიებში სტატიებს 19 არარსებული ჟურნალისტი აქვეყნებდა, ზოგის პროფილი კი Deepfake-ით იყო გაკეთებული.

ჟურნალისტები მიიჩნევენ, რომ ყალბი ჟურნალისტების წინააღმდეგ ზომები უნდა იქნას მიღებული. ბევრი შიშობს, რომ დროთა განმავლობაში ყალბი ინფორმაციის გავრცელების შეფერხება უფრო და უფრო გართულდება.

სტატია მოამზადა On.ge-მ აღმოსავლეთ-დასავლეთის მართვის ინსტიტუტის (EWMI) ACCESS-ის პროექტის ფარგლებში. მასალის დამზადება შესაძლებელი გახდა ამერიკელი ხალხის მხარდაჭერის შედეგად ამერიკის შეერთებული შტატების საერთაშორისო განვითარების სააგენტოს (USAID) დაფინანსებით. სტატიის შინაარსზე პასუხისმგებელია On.ge. ის შესაძლოა არ გამოხატავდეს EWMI-ს, USAID-ის ან/და ამერიკის შეერთებული შტატების შეხედულებებს.

თუ გინდა, რომ ნამდვილი და ყალბი ამბები ერთმანეთისგან მარტივად განასხვავო და დეზინფორმაციისგან სხვებიც დაიცვა, შემოგვიერთდი ჯგუფში – ერთად ვებრძოლოთ დეზინფორმაციას.