სუპერგმირებზე გადაღებული ფილმების ნახვისას, ალბათ, ერთხელ მაინც ყველას გაუფიქრია, როგორი იქნება ჩვენი ცხოვრება, კომიქსის პერსონაჟებივით ზებუნებრივ ძალებს რომ ვფლობდეთ. მსგავსი გმირების გამოცდილების გაზიარების შანსი, ალბათ, საერთოდ არ გვაქვს, მაგრამ ნეტფლიქსი თავის ახალ ფილმში მომავლის შესაძლებლობებს უფრო ოპტიმისტურად უყურებს.

შესაძლოა, დაბადებიდან თანდაყოლილი უჩვეულო უნარი არ გვაქვს, თუმცა ხომ შეიძლება შეიქმნას საშუალება, რომელიც შესაძლებლობას მოგვცემს, განსაკუთრებულ ძალას ვფლობდეთ?

ალბათ, არც ესაა შესაძლებელი, თუმცა ფილმში Project Power ეს ყველაფერი უფრო დამაჯერებლად გამოიყურება:

როგორც ტრეილერიდან ვიგებთ, ამ ახალი სამეცნიერო ფანტასტიკის ჟანრის ფილმის სიუჟეტი ისეთ სამყაროში ვითარდება, სადაც არსებობს სპეციალური პრეპარატი, რომლის მიღების შემდეგაც ხუთი წუთის განმავლობაში ზებუნებრივი ძალა გიჩნდება, ოღონდ წინასწარ არასდროს იცი, თუ რა ძალა იქნება ეს.

ფილმში მთავარ როლს ჯეიმი ფოქსი ასრულებს: მისი პერსონაჟის შვილი მოიტაცეს და ახალგაზრდა მამის მთავარი მიზანიც, სწორედ შვილის დაბრუნებაა. ჯეიმი ფოქსი ისეთი ცნობილი ფილმების ვარსკვლავია, როგორებიცაა Django Unchained, Baby Driver და Just Mercy.

ჯეიმისთან ერთად კინოსურათში მონაწილეობს ჯოზეფ გორდონ-ლევიტი, რომელიც აქამდე გვიხილავს ფილმებში Inception, The Dark Knight Rises და Lincoln.

Project Power ჰენრი ჯუსტონმა და არიელ შულმანმა გადაიღეს, რომელთაც მანამდე პარანორმალური მოვლენების მესამე და მეოთხე ნაწილის შექმნაში მიუღიათ მონაწილეობა.

ნეტფლიქსის პლატფორმაზე ამ მძაფრსიუჟეტიანი სანახაობის შეფასება 14 აგვისტოდან იქნება შესაძლებელი.