პარლამენტის წევრი მანანა კობახიძე მიიჩნევს, რომ USAID-ის ხელმძღვანელის განცხადება აშშ-ის სახელმწიფო დეპარტამენტის პოზიციას არ შეესაბამება:

"რა თქმა უნდა, კონკრეტულ პირებს აქვთ თავისი პოზიცია. სახელმწიფო დეპარტამენტი თავის პოზიციას თავის ანგარიშებში აქვეყნებს და ჩვენ, რა თქმა უნდა, ყოველთვის ყურადღებით ვკითხულობთ ამ ანგარიშებს, ვადევნებთ თვალ-ყურს იმ რეკომენდაციებს და ვასრულებთ, რომელიც არის მათი მხრიდან გამოთქმული. ჩვენ ვფიქრობთ, რომ სასამართლოს დამოუკიდებლობის და თავისუფლების პირობებში იქნება მიღებული სამართლიანი გადაწყვეტილება. იმის იქით, პოლიტიკოსების მხრიდან რაიმე განცხადების გაკეთება, მით უმეტეს რუსთავი 2-ის თემაზე, მე ვფიქრობ, რომ არ არის სწორი. ეს დისკუსია უნდა დასრულდეს და სასამართლომ უნდა მიიღოს კანონიერი და სამართლიანი გადაწყვეტილება."

ამერიკის საერთაშორისო განვითარების სააგენტოს ხელმძღვანელის მოადგილემ, თომას მელიამ, რომელიც თბილისში იმყოფება, ჟურნალისტებთან განაცხადა, რომ რუსთავი 2-თან დაკავშირებით მიმდინარე დავა პლურალიზმზე ახდენს გავლენას.