სოციალური ქსელის, Google Plus-ის გაუქმებიდან 2 წლის შემდეგ კომპანიამ ახალი ამბიციური პროექტი, სახელწოდებით Keen წარმოადგინა. ახალი სერვისი თემატური ბარათების (ე.წ ქარდების) სისტემაზეა აგებული, რომელიც მომხმარებლებს ონლაინ ინტერესების მიხედვით აერთიანებს. Keen-ში ბარათების შერჩევის პროცესი გუგლმა ხელოვნურ ინტელექტს მიანდო.

გუგლის სტარტაპ-ინკუბატორ Area 120-ში შექმნილი ახალი სოციალური ქსელის ინტერფეისი დაფების (Keens) პრინციპით არის აწყობილი, რომელზეც შეგიძლიათ "მიაკრათ" სასურველი სტატიები, სურათები ან თემატურად თქვენთვის საინტერესო ნებისმიერი კონტენტი.

მომხმარებელს ასევე შეუძლია, საკუთარი დაფა დამალოს ან ის ყველასთვის საჯარო გახადოს. სერვისის ალგორითმი, რომელიც მანქანურ დასწავლას იყენებს, მომხმარებელს პირადი კოლექციისთვის საინტერესო მასალას თავად შესთავაზებს.

გუგლის ანგარიშით ავტორიზაციის შემდეგ საკმარისია აირჩიოთ თქვენთვის საინტერესო კატეგორიები და აპლიკაცია თქვენზე მორგებულ რეკომენდაციებს გაგიზიარებთ — იქნება ეს ტექსტური მასალა, სურათი, YouTube რგოლი თუ ნივთი ინტერნეტ მაღაზიიდან.

Keen-ის გამოსაყენებლად შეგიძლიათ ეწვიოთ მის ვებ-გვერდს ან გადმოიწეროთ სოციალური ქსელის ანდროიდ აპლიკაცია. Keen-ის iOS-ზე გამოჩენის ვადები ამჟამად უცნობი რჩება.