ცნობილმა ბრიტანელმა მსახიობმა დენიელ რედკლიფმა დევიდ ჰოლმსთან ერთად, რომელიც ჰარი პოტერის ფილმების სერიაში მისი კასკადიორი იყო, ახალი პოდკასტების სერია Cunning Stunts დააანონსა.

დენიელ რედკლიფი მიიჩნევს, რომ კინოსამყაროში კასკადიორების შრომა ხშირ შემთხვევაში დაუფასებელია, არადა ამ პროფესიის ადამიანების კარიერა მუდმივად რისკის ქვეშაა: მაგალითად, დევიდ ჰოლმსი ჰარი პოტერის ფილმების გადაღებებზე მძიმედ დაშავდა და კისრის მოტეხილობის გამო პარალიზებულია.

10 ივნისს გამოქვეყნებულ ინტერვიუში რედკლიფმა აღნიშნა, რომ ამ პოდკასტით კასკადიორების შრომის შესახებ ცნობიერების ამაღლება სურს:

"კასკადიორების შესახებ მითი არსებობს, რომ ისინი უბრალოდ ზეადამიანები არიან. როცა მაყურებელი ფილმში მტკივნეულ ან საშიშ სცენებს ადევნებს თვალს, ფიქრობს, რომ ეს ვიზუალური ეფექტების ან რაიმე ჭკვიანური და უსაფრთხო საშუალებით გადაიღეს. არადა ხშირად ასე სულაც არაა: მაგალითად, არ არსებობს კიბეებზე დაგორების რამენაირად გაყალბების გზა. ან როცა პერსონაჟს მანქანა ეჯახება, გადაღებისას მართლაც ასე ხდება, თუნდაც ეს შედარებით შენელებულად ხდებოდეს. სწორედ კასკადიორები ასრულებენ ამ ყველაფერს, მართალია, მაქსიმალურად უსაფრთხოდ, მაგრამ ეს პროცესი მაინც მტკივნეულია", — ამბობს მსახიობი.

სწორედ მის გამო, ჰარი პოტერის ვარსკვლავი მიიჩნევს, რომ ჰოლივუდმა უფრო მეტად უნდა დააფასოს ამ პროფესიონალების შრომა, თუნდაც ოსკარების დაჯილდოებაზე მათი წარდგენით. მან გაიხსენა ცნობილი კასკადიორი ოლივია ჯეკსონი, რომელმაც Resident Evil-ის გადაღებებზე ერთი ხელი დაკარგა და მძიმე დაზიანებების გამო სხეულის ნახევარი პარალიზებული აქვს.

"როცა აცნობიერებ, თუ რა შეემთხვათ დევიდ ჰოლმსისა და ოლივია ჯეკსონის მსგავს ადამიანებს, ხვდები, რომ ისინი საკუთარ სიცოცხლეს აგდებენ საფრთხეში იმ ფილმების შესაქმნელად, რომლებიც ასე ძალიან გვიყვარს. დაუჯერებელია, რომ ამას აქამდე არ ვაფასებთ", — განაცხადა რედკლიფმა.

დენიელ რედკლიფი, რუპერტ გრინტი და ემა უოტსონი ფილმის ჰარი პოტერი და სიკვდილის საჩუქრები: ნაწილი პირველი გადასაღებ მოედანზე.

ფოტო: Warner Bros.

დენიელ რედკლიფი და დევიდ ჰოლმსი თავიანთ ახალ პოდკასტების სერიაში სწორედ სხვადასხვა კასკადიორებთან ერთად ისაუბრებენ მაყურებლებისთვის ხშირ შემთხვევაში უხილავ შრომაზე: მათ შორის მათ სტუმრად ეყოლებათ დერეკ ლი, რომელიც ისეთი ცნობილი ფილმების კასკადიორი იყო, როგორებიცაა ჯეიმს ბონდი და ტიტანიკი.