American Horror Story-ის ფანებს უკვე შეუძლიათ დარწმუნებულები იყვნენ, რომ საშინელებათა ჟანრის ამ ცნობილ ანთოლოგიაში მაკოლეი კალკინის შესაფერისი დებიუტი შედგება.

6 მაისს გამოქვეყნებულ ინტერვიუში ამ გახმაურებული სატელევიზიო შოუს შემოქმედმა რაიან მერფიმ მეათე სეზონთან დაკავშირებულ დეტალებზე ისაუბრა. თავდაპირველად მან აღნიშნა, რომ ძალიან სურდა მაკოლეი კალკინი თავის პროექტში ეხილა:

"ყოველთვის ძალიან მომწონდა ის, რასაც მაკოლეი კალკინი აკეთებდა. მიყვარს მისი Home Alone და ის რაღაცებიც, რაც უფრო გვიანდელ ასაკში შექმნა."

შემდეგ კი რაიან მერფიმ გაიხსენა, თუ როგორ დაითანხმა ეს ცნობილი მსახიობი თავის სერიალში მონაწილეობაზე:

"როდესაც სამსახიობო გუნდს ვადგენ, როგორც წესი, მსახიობებს არასდროს ვაძლევ უფლებას წინასწარ წაიკითხონ სცენარი. მაგრამ, როცა მას როლი შევთავაზე, ვუთხარი, რომ მის პერსონაჟს გადარეული, ეროტიკული სექსი ექნებოდა კეტი ბეიტსის პერსონაჟთან. მცირეხნიანი დუმილის შემდეგ კი მიპასუხა: "როგორც ჩანს, სწორედ ამ როლისთვის ვარ დაბადებული".

View this post on Instagram

Things are beginning to wash up on shore...

A post shared by Ryan Murphy (@mrrpmurphy) on

ჯერ კიდევ თებერვალში დადასტურდა, რომ American Horror Story-ის მეათე სეზონში Home Alone-ის სახელით ცნობილი საკულტო ფილმების სერიის მსახიობს ვიხილავდით. მასთან ერთად ახალ სეზონში ამ შოუს მოყვარულთათვის კარგად ნაცნობი ისეთი სახეებიც მიიღებენ მონაწილეობას, როგორებიც სარა პოლსონი, ივან პეტერსი, კეტი ბეიტსი და ლილი რეიბი.

ჯერჯერობით უცნობია, თუ რა იქნება ახალი სეზონის თემატიკა ან როდის დაიწყება გადაღებები: The Wrap-თან მიცემულ ინტერვიუში რაიან მერფიმ აღნიშნა, რომ სცენარი უკვე მზადაა და გადაღებები თბილ ამინდში უნდა დაწყებულიყო, თუმცა პანდემიამ ამაში ხელი შეუშალა:

"გადაღებისას ძალიან ბევრი რამ ამინდზე იყო დამოკიდებული. ამიტომ ახლა არ ვიცი, რას ვიზამთ და ამ სეზონს რას მოვუხერხებთ. არც ის ვიცი დავაჩქარებთ გადაღებას თუ შემდეგი წლისთვის გადავდებთ".

ერთგულ ფანებს ისღა დარჩენიათ იმედოვნონ, რომ ახალ სეზონს წლის ბოლომდე იხილავენ, თუ არადა კეტი ბეიტსისა და მაკოლეი კალკინის ეროტიკული სცენის ნახვა მაინც არასდროს იქნება გვიანი.

ფოტო: FX / Buzzfeed