საქართველოში კორონავირუსით მე-10 პაციენტი გარდაიცვალა.

ინფორმაცია უკვე აისახა StopCov.ge-ზე.

ამ დროისთვის უცნობია გარდაცვლილის ასაკი, სად მკურნალობდა ის და ჰქონდა თუ არა ქრონიკული დაავადებები.

ამ ინფორმაციის მიღებისთანავე მასალა განახლდება.

განახლება: ცნობილი გახდა, რომ გარდაცვლილი 45 წლის ქალია და ის 26 მარტიდან გორის სამხედრო ჰოსპიტალში იმყოფებოდა. კლინიკის ინფორმაციით, მას თანმხლები მძიმე დაავადებები ჰქონდა.

"პაციენტს ასევე აღენიშნებოდა თანმხლები დაავადებები, არტერიული ჰიპერტენზია, უნივერსალური სიმსუქნე. პაციენტს ჩაუტარდა კომპიუტერული ტომოგრაფია, სადაც ვლინდებოდა ორმხრივი პნევმონია, მრავლობითი ინფილტრაციები ე.წ. "დაბურული მინის" ტიპით. მოგვიანებით განვითარდა ორმხრივი სპონტანური სისხლჩაქცევა თხემ-კეფის მიდამოში (ნეიროქირურგიულად შეფასდა როგორც ინოპერაბელური). მდგომარეობა შეფასდა როგორც კრიტიკული, რის გამოც ის მკურნალობას რეანიმაციისა და ინტენსიური თერაპიის განყოფილებაში გადიოდა. პაციენტის მდგომარეობა კლინიკაში მკურნალობის დღიდან იყო მძიმე, რასაც განაპირობებდა თანხმლები დაავადებები. მკურნალობა მიმდინარეობდა პროტოკოლის მიხედვით. თუმცა ვირუსის შედეგად გამოწვეული სხვადასხვა დაავადებების გართულებით, ექიმების მცდელობის და ძალისხმევის მიუხედავად, დაფიქსირდა ბიოლოგიური სიკვდილი", — ამბობენ ჰოსპიტალში.

ამ დროის მონაცემებით, საქართველოში კორონავირუსის 623 დადასტურებული შემთხვევაა. მათ შორის 288 გამოჯანმრთელდა, 10 კი გარდაიცვალა. კარანტინის რეჟიმში იმყოფება 4702 ადამიანი, ხოლო სტაციონარში მეთვალყურეობის ქვეშ — 459.