ოსკაროსანი მსახიობი და გაეროს კეთილი ნების ელჩი ნიკოლ კიდმანი ქალებზე ძალადობის წინააღმდეგ იწყებს ბრძოლას.

"ქალებს და გოგონებს ვჭირდებით ჩვენ, ვისაც გვაქვს უნარი და ფული იმისათვის, რომ მათ დავეხმაროთ", - თქვა მსახიობმა.

ნიკოლ კიდმანი აღნიშნავს, რომ 10 წლის წინ კოსოვოში ძალადობის მსხვერპლი ქალების ნახვამ მისი ცხოვრება შეცვალა. უამრავი დრო გაატარა იმაზე ფიქრში, თუ რა შეეძლო გაეკეთებინა მათთვის.

რამდენიმე დღის წინ ქალების უფლებებისადმი მიძღვნილ ღონისძიებაზე მსახიობმა განაცხადა, რომ მზად არის ხმა იყოს იმათთვის, ვისაც ხმის ამოღების ეშინია.

"ჩაიხედეთ თქვენს საფულეებში, ამ ქალებს მხოლოდ ჩვენი სიტყვებით ვერ ვუშველით", - თქვა კიდმანმა და პირობა დადო, რომ ყოველთვიურად მინიმუმ $50 000-ს გადარიცხავს იმ ფონდებში, რომლებიც ქალებზე ძალადობის წინააღმდეგ იბრძვიან.

გაერთიანებული ერების მონაცემებით, დღეს მსოფლიოს მასშტაბით სამიდან ერთი ქალი ფსიქოლოგიური ან ფიზიკური ძალადობის მსხვერპლია, მოძალადეები კი, როგორც წესი, მათი პარტნიორები არიან.