ალბათ გემახსოვრებათ 90-იან წლებში პოპულარული ჯგუფი Spice Girls, რომელმაც მსოფლიო მსმენელის გული ადვილად დაიპყრო და წლების განმავლობაში მუსიკალური ჩარტების ტოპ ადგილებიდან არ ჩამოსულა.

ჯგუფის სლოგანი Girl Power იყო, რომელიც იმ დროს მარკეტინგულ ხრიკად უფრო ჩანდა, ვიდრე რეალურ ფემინისტურ განცხადებად. მაშინდელ მსოფლიოში ფემინიზმისა და გენდერული თანასწორობის თემატიკა ისეთი აქტუალური არ იყო, როგორიც დღესაა, განსაკუთრებით კი შოუ-ბიზნესში. თავად Spice Girls-იც ძირითადად სექსუალური კუთხით ყიდიდა თავის თავს, განსაკუთრებით, მისი სამი წევრი: ჯერი ჰოლიველი, ემა ბანტონი და ვიქტორია ადამსი.

თუმცა, როგორც ახლად გავრცელებულ კადრებში ჩანს, გოგონები მამაკაცების სექსისტურ დამოკიდებულებაზე თვალს არ ხუჭავდნენ.

Mel B გადამღები ჯგუფის ერთ-ერთ წევრთან მიდის, რომელმაც, როგორც ვიდეოდან ვხვდებით, შემსრულებლებისგან მკერდის უფრო მეტად გამოჩენა ითხოვა. მელანი კაცს ეკითხება, "რატომ თქვი ეგ?", ის კი პასუხობს, "იმიტომ, რომ ყველა კაცის ფანტაზია ეგაა". რაზეც მელ ბი ბრაზდება და უკმაყოფილებას არ მალავს. შემდეგ კი ჩანს ჯერი ჰოლიველი, რომელიც იმავე ტიპს შოვინისტ ღორს უწოდებს.

ვიდეო 1997 წელს არის გადაღებული. კადრები რამდენიმე დღის წინ გავრცელდა ტვიტერზე.