19 ნოემბერს, შაბათს, თბილისში მულტიფუნქციური კულტურული სივრცე/პლატფორმა SPACEHALL იხსნება. ის Bassiani-ს ოჯახის ახალი წევრია, რომელიც მსმენელს საერთაშორისო დონის მუსიკალურ ბენდებს, ელექტრონულ მუსიკას, საშემსრულებლო ხელოვნების აქტუალურ არტისტებს, ცოცხალ კონცერტებსა და წარმოდგენებს შესთავაზებს.

დარბაზი წერეთლის 2 ნომერში, Dinamo Arena-ს ქვეშ, კლუბ Bassiani-ს გვერდით მდებარეობს.

SPACEHALL თვეში რამდენჯერმე უმასპინძლებს როგორც ტრადიციული ფორმის კონცერტებს, ასევე სხვადასხვა პერფორმანსს. მსმენელი/მაყურებელი შეძლებს ინტერაქციას მოწვეულ არტისტებთან, ქართველ ხელოვანებს კი საშუალება მიეცემათ, მსოფლიო კულტურული პროცესების ნაწილად იქცნენ.

გახსნის სტუმარია Omar S. პროდიუსერი და დიჯეი ტექნოს სამშობლოდან, დეტროიტიდან. მისი კარიერა 2000-იან წლებში დაიწყო. Theo Parrish-თან ჩაწერილმა კოლაბორაციამ არტისტს საერთაშორისო აღიარება მოუტანა. 2007 წელს გამოსული ტრეკი Psychotic Photosynthesis ონლაინგამოცემა Resident Advisor-მა ათწლეულის საუკეთესო ტრეკად დაასახელა.

ღონისძიება 23:00 საათზე დაიწყება. სტუმრები Omar S-თან ერთად ქართველ დიჯეისა და პროდიუსერს, KVANCHI-ს და Vodkast Records-ის დამფუძნებელს, დიჯეისა და ვინილ კოლექტორს, VAKHO-ს მოუსმენენ.

აქვე დაიდებს ბინას ექსპერიმენტული მუსიკალური პროექტი MUZAME, რომლის პირველი ცოცხალი ღონისძიება ახალ სივრცეში 4 დეკემბერს გაიმართება და თანამედროვე ელექტროპოპის ახალ სახეს, დუო EASTER-ს წარუდგენს მსმენელს.

14 დეკემბერს კი მსმენელი MUZAME-ს ფარგლებში ლეგენდარული შვედური ჯგუფის, დრიმპოპ კოლექტივის, The Radio Dept.-ის ლაივზე დასწრებას შეძლებს.