მსოფლიოს მოსახლეობის უმეტესობის მსგავსად, ცნობილი ესპანელი რეჟისორი პედრო ალმოდოვარიც იზოლაციაშია, რა დროსაც ამ ერთ-ერთმა ყველაზე გამორჩეულმა თანამედროვე კინოხელოვანმა ერთგვარი დღიურების წერა და საჯაროდ გამოქვეყნება დაიწყო.

10 აპრილს IndieWire-ზე გამოქვეყნებულ ჯერჯერობით ბოლო ჩანაწერში ალმოდოვარმა პოპვარსკვლავ მადონასთან შეხვედრის დეტალები გაიხსენა: მისი თქმით, მომღერალი 1990 წელს თავად დაუკავშირდა და მადრიდში წვეულებაზე მიიწვია, ოღონდ რეჟისორს მსახიობ ანტონიო ბანდერასის წაყვანაც სთხოვა.

"ჩემ გარდა ამ წვეულებაზე ის მხოლოდ ანტონიო ბანდერასით იყო დაინტერესებული", — წერს ოსკაროსანი რეჟისორი.

ალმოდოვარმა პოპდივასთან შეხვედრა დეტალურად აღწერა:

"მადონამ გადაწყვიტა, მაგიდასთან ვინ სად დაჯდებოდა (იქ იყო რამდენიმე მრგვალი მაგიდა ჩემი მეგობრებისა და მისი მოცეკვავეებისათვის). ბუნებრივია, ის მთავარ მაგიდასთან დაჯდა, გვერდით კი მე და ანტონიო ბანდერასი დაგვსვა. ბანდერასის ცოლი, ანა ლეზა კი ჩვენგან ყველაზე შორს გაამწესა".

ესპანელი რეჟისორის თქმით, მადონა ყურადღებას მხოლოდ მას და ანტონიო ბანდერასს აქცევდა, რომელმაც ამ შეხვედრამდე ცოტა ხნით ადრე ალმოდოვარის ფილმ Tie Me Up! Tie Me Down!-ში ითამაშა:

"ანტონიოს შევიწროება იმ საღამოს ერთ-ერთი ძირითადი ნაწილი იყო. ვახშმის დასრულებისას ანა ლეზა ჩვენს მაგიდასთან ახლოს მოვიდა და ღვთაებრივ ქერათმიანს სარკასტულად უთხრა: "ვხედავ, ჩემი ქმარი მოგწონს. არ მიკვირს, რადგან ყველა ქალს მოსწონს ის, თუმცა ეს არ მადარდებს, რადგან თანამედროვე ქალი ვარ". მას კი მადონამ ასე უპასუხა: "თავიდან მომწყდი".

როგორც ალმოდოვარი იხსენებს, მაშინ ანტონიო ბანდერასი ინგლისურად არ ლაპარაკობდა, ამიტომ მასა და მადონას შორის ერთგვარი თარჯიმნის როლი შეითავსა:

"მადონამ მითხრა ანტონიოსთვის მეკითხა, "თუ მოსწონდა ქალებისთვის დარტყმა" და მეც ვუთარგმნე. ანტონიომ თავიდან არაფერი თქვა, მერე კი ამოილუღლუღა: "ესპანელი ჯენტლმენი ვარ და იმას გავაკეთებ, რასაც ქალბატონი მთხოვს". ჩემთვის ეს სრულიად გასაგები და საკმარისი პასუხი იყო, თუმცა მადონას უფრო მეტი უნდოდა: მთხოვა, ამჯერად მეთარგმნა, ის თუ მოსწონდა, ქალები რომ ურტყამდნენ მას".

მადონამ ამ შეხვედრის ამსახველი კადრები თავისი 1991 წელს გამოქვეყნებულ დოკუმენტურ ფილმ Madonna: Truth or Dare-ში გამოიყენა. პედრო ალმოდოვარის თქმით კი, მასზე ამ შეხვედრამ წარუშლელი კვალი დატოვა:

"არ მადარდებს, თუ ეს ძველი ანგარიშის გასწორებას ჰგავს. მადონა სულელებივით მოგვექცა და ამის შესახებ ოდესმე უნდა მომეყოლა. მას ნებართვაც კი არ უთხოვია, ისე გამოიყენა იმ დღეს გადაღებული ფოტოები. ამასთანავე კადრებში ჩემი საუბარი სხვას გაახმოვანებინა, რადგან ჩემი ინგლისური საკმარისად კარგი არ აღმოჩნდა მისთვის".

ცნობილი თანამედროვე ესპანელი რეჟისორის მიერ გამოქვეყნებული მემუარების შესახებ მადონას ჯერჯერობით კომენტარი არ გაუკეთებია.