რუსეთის პატრიარქმა მრევლს მოუწოდა სახლებიდან ძლიერ ილოცონ და დრო ტელევიზორებთან გაატარონ, სადაც ეკლესიებიდან ღვთისმსახურება პირდაპირ ეთერში იქნება.

კირილმა ეს განცხადება სადღესასწაულო ლიტურგიაზე, ტაძარში გააკეთა, სადაც მრევლი არ იმყოფებოდა.

"მართალია, ამ დღეებში ჩვენი ეკლესიის ბევრი ტაძარი სანიტარული მოთხოვნების გამო დაკეტილია, ჩვენს სახლებშიც კი, მოდით, ძლიერ ვილოცოთ, გავატაროთ დრო ტელევიზორთან, როცა იქ არის ღვთისმსახურების ტრანსლაცია. ვილოცოთ საკუთარი თავებისთვის, რათა უფალი დაგვეხმაროს გადავლახოთ ცხოვრებისეული ცდუნება და გავაცნობიეროთ რაოდენ მნიშვნელოვანია მასთან ყოფნა სიხარულსა და მწუხარებაში", — თქვა რუსეთის პატრიარქმა.

ამ განცხადებამდე ცნობილი გახდა, რომ მოსკოვის ოლქში, მათ შორის, ქალაქ მოსკოვში, 19 აპრილის ჩათვლით, ღვთისმსახურებები მრევლის გარეშე ჩატარდება. მოსკოვის საპატრიარქოს ვებგვერდზე გამოქვეყნებული წერილის მიხედვით, გადაწყვეტილება ხელისუფლების სანიტარულ რეკომენდაციებს უკავშირდება. ის ძალაში ხვალიდან, 13 აპრილიდან შედის და აღდგომის ჩათვლით გრძელდება.

Worldometers-ის ინფორმაციით, ამ დროისთვის რუსეთში კორონავირუსის 15,770 დადასტურებული შემთხვევაა, მათ შორის 130 გარდაიცვალა.