ბილ გეიტსის განცხადებით, ამერიკელები COVID-19-ისგან თავს სრულად დაცულად, სავარაუდოდ, 2021 წლის შემოდგომამდე ვერ იგრძნობენ. ეს პროგნოზი ეფუძნება კორონავირუსის მკურნალობაზე მომუშავე მკვლევრების პოზიციას, რომლის მიხედვითაც, ვაქცინის აღმოჩენასა და შემდეგ მის საყოველთაო გავრცელებას ერთ წელზე მეტი დასჭირდება.

"ვაქცინა კრიტიკული მნიშვნელობისაა, რადგან მის გარეშე ცხოვრება ნორმალურ რიტმს ვერ დაუბრუნდება", — თქვა მილიარდერმა ფილანტროპმა 7 აპრილის ინტერვიუში, — "შეიძლება, სიტუაციის შემსუბუქების რაღაც საფეხურს მივაღწიოთ, თუმცა საყოველთაოდ ხელმისაწვდომი ვაქცინის გარეშე ყოველთვის იქნება დაავადების აფეთქების განმეორების რისკები".

ფიზიკური დისტანცირება COVID-19-ით ინფიცირების შემთხვევების კლებაში გვეხმარება. "მიზანია, რაოდენობა იქამდე შემცირდეს, რომ კონტაქტების აღრიცხვა (პროცესი, რომლის დროსაც დაინფიცირებულ პირებთან ახლო კონტაქტში მყოფი ადამიანების ახლო მონიტორინგი ხდება) შესაძლებელი გახდეს", — განმარტავს გეიტსი.

გეიტსისთვის ინტერვიუს ჩამომრთმევი, ჯუდი ვუდრაფი ტვიტერზე: "ბილ გეიტსი მსჯელობს კოვიდის ტესტირების შესახებ, რომელიც უფრო მეტად ხელმისაწვდომი უნდა გახდეს და ამატებს, რომ პარალელურად ისევე სწრაფად უნდა შევძლოთ მკურნალობის გზების მოძიება, როგორც ვაქცინის. ის ვარაუდობს, რომ სამკურნალო საშუალებები ხელმისაწვდომი 3-6 თვეში შეიძლება იყოს".

იმის გასაცნობიერებლად, თუ როგორი იქნება ცხოვრება აშშ-ში 6-12 თვის შემდეგ, გეიტსის აზრით, ჩინეთი სამაგლითო მოდელად გამოდგება. "ისინი უკვე აბრუნებენ ადამიანებს სამსახურებში, თუმცა ყველა იყენებს ნიღბებს, იმოწმებს ტემპერატურას. ასევე გაუქმებულია დიდი სპორტული ღონისძიებები. ეს ყველაფერი კეთდება იმისთვის, რომ თავიდან აირიდონ ეპიდემიის ახალი ტალღა", — ამბობს ის.

ასევე შესაძლებელია, რომ შეკრებები მათში მონაწილე ადამიანების ასაკის მიხედვით დაიშვას. "მაგალითად, ერთ კლასში 30 ახალგაზრდის ყოფნა, შეიძლება, მისაღები გახდეს. დაავადების გავრცელებაში ამ ასაკობრივი ჯგუფის როლს მომდევნო ერთ-ორ თვეში უკეთესად გავიგებთ. შეიძლება, ეს როლი იმდენად უმნიშვნელო აღმოჩნდეს, რომ ახალგაზრდების შეკრებასთან უფრო ლიბერალური წესები დადგინდეს, ვიდრე უფროსი ასაკის ხალხთან მიმართებით", — ამბობს გეიტსი.

ამავდროულად, ის ხაზს უსვამს, რომ შედარებით ფართომასშტაბიანი შეკრებები "საყოველთაო ვაქცინაციის დაწყებამდე შეიძლება არ აღდგეს".

"ნორმალურთან მიახლოებული ცხოვრების დაბრუნების პროგნოზირება სხვა ქვეყნების ქმედებებზე დაკვირვებით შეიძლება", — ამბობს ინტერვიუს დროს ვუდროფი, რაზე საპასუხოდაც გეიტსი განმარტავს, რომ "მაგალითისთვის, შვედეთი არ მიმართავს ადამიანთა იზოლაციის მკაცრ წესებს, შესაბამისად, მათი გამოცდილება სასარგებლო იქნება".

გეიტსი თანამშრომლობს ვაშინგტონის უნივერსიტეტის გლობალური ჯანმრთელობის კვლევით ცენტრთან, რათა სხვადასხვა ქვეყანაში არსებულ გამოცდილებაზე დაყრდნობით გაიგოს, "რომელი ქვეყნის რა ტიპის პოლიტიკა მუშაობს კარგად".