ეკა ბაშელეიშვილი სამი დღის წინ დაბრუნდა ამერიკიდან და ქმართან ერთად ბათუმში, სასტუმრო ეიფორიაში, საკარანტინე ზონაში იმყოფება. დღეს ეკა 50 წლის გახდა და კარანტინში მას სასტუმროს პერსონალმა დაბადების დღე ტორტით მიულოცა.

ვიდეო ეკამ ჯგუფში გააზიარა, სადაც პოსტს 1 საათში 6 ათასზე მეტი გამოხმაურება აქვს. 25-წამიან ვიდეოში ვხედავთ, როგორ რეკავენ ზარს სასტუმროს ნომერზე. კარების გაღების შემდეგ, ეკას ეკას სპეციალურ აღჭურვილობაში გამოწყობილი ადამიანი ტორტით ხელში ხვდება და დაბადების დღეს ულოცავს, თუმცა უსაფრთხოების გამო, ნომერში არ შედის.

"ბევრს გაუჩნდა შეკითხვა, ვინ იღებსო, არ ჰგავს კარანტინსო. არადა, მე და ჩემი მეუღლე ერთად მოვხვდით კარანტინში. ამერიკიდან ერთად ჩამოვფრინდით და მას დაურეკეს მიმღებიდან, იცოდა ამ სიურპრიზის შესახებ და იღებდა. მართლა არ ველოდი", — ამბობს ეკა On.ge-სთან საუბრისას.

მისი სიტყვებით, ამერიკაში სამოგზაუროდ იმყოფებოდა, თუმცა კორონავირუსის რისკის გამო ვიზიტი შეწყვიტა, ბილეთი გადაცვალა და საქართველოში სამ კვირაში დაბრუნდა. ეკას და მის ქმარს შვილები თბილისში ელოდებიან, როგორც მან გვითხრა, მის გოგონას 23 წელი გუშინ შეუსრულდა:

"აი ასეთ სიტუაციაში შევხვდით დაბადების დღეებს. იმედი ვიქონიოთ უკეთესობის, უნდა შევეცადოთ, რომ მაინც პოზიტივი შევინარჩუნოთ".

ეკას თქმით, ნომერში მომსახურებით კმაყოფილია და სერვისი სრულიად უფასოა, ექიმი კი ყოველდღე ურეკავს და მის მდგომარეობას ამოწმებს. როგორც მას უთხრეს, კარანტინში 2 კვირას გაატარებს.

კორონავირუსთან დაკავშირებით მთავრობაში შემქნილი საკოორდინაციო საბჭოს გადაწყვეტილებით, ყველა მოქალაქე, რომელიც დღეიდან, 20 მარტიდან, საქართველოს საზღვარს გადმოკვეთს, კარანტინში იქნება მოთავსებული.