დღეს, 8 მარტს ქალთა მოძრაობამ ფილარმონიასთან ფემიციდის საწინააღმდეგო აქცია-პერფრომანსი გამართა და ქალთა მიმართ ძალადობა გააპროტესტა. აქციაზე იმყოფებოდნენ პოლიტიკოსი ქალები და სამოქალაქო აქტივისტებიც.

ქალებმა შეასრულეს საპროტესტო ცეკვა, რომელმაც მთელი მსოფლიო მოიცვა და ძალადობის საპროტესტო სიმბოლურ აქტად იქცა.

როგორც ქალთა მოძრაობის ერთ-ერთმა წარმომადგენელმა, ბაია პატარაიამ თქვა, პერფორმანსის მთავარი მესიჯი ისაა, რომ ფემიციდთან მიმართებით ყველამ საკუთარი პასუხისმგებლობა იგრძნოს.

"ეს პერფორმანსი ძალიან ბევრ ქვეყანაში ჩატარადა. პირველად ეს მოხდა ჩილეში. ჩვენ გადავაქართულეთ ეს ტექსტი და ფემიციდის წინააღმდეგ გადმოვიტანეთ. მთავარი მესიჯი არის ის, რომ ყველამ უნდა იგრძნოს საკუთარი პასუხისმგებლობა ასეთი სოციალური პრობლემებისა და დანაშაულის წინაშე. ყველამ თუ არ შევეცადეთ, მხოლოდ პოლიცია ამ პრობლემას ვერ მოაგვარებს", — განაცხადა ბაია პატარაიამ.

ნახეთ ფოტორეპორტაჟი აქციიდან.

ფოტო: გვანცა ნემსაძე / On.ge

ფოტო: გვანცა ნემსაძე / On.ge

ფოტო: გვანცა ნემსაძე / On.ge

ფოტო: გვანცა ნემსაძე / On.ge

ფოტო: გვანცა ნემსაძე / On.ge

ფოტო: სალომე ჩიკვილაძე / On.ge

ფოტო: სალომე ჩიკვილაძე / On.ge

ფემიციდის სტატისტიკა საქართველოში

13 თებერვალს შინაგან საქმეთა სამინისტრომ ოჯახური დანაშაულის სტატისტიკა წარადგინა. უწყების თქმით, 2019 წელს ოჯახურ დანაშაულს 7 ქალი ემსხვერპლა, რაც 2018 წლის მაჩვენებელს უდრის, თუმცა წინა წლებზე თითქმის ორჯერ ნაკლებია.

შსს-ში ამბობდნენ, რომ ამ დანაშაულზე მიმართვიანობა გაიზარდა და 6 000-ზე მეტ ფაქტზე დაიწყეს გამოძიება, ბრალი წარუდგინეს 4 564 მოძალადეს და 10 266 შემაკავებელი ორდერიც გამოწერეს.

ერთი შეხედვით, სტატისტიკა პრევენციის მექანიზმის შედეგიანობაზე გვიჩვენებდა, თუმცა 2020 წლის პირველ სამ თვეში უკვე 8 ქალი მოკლეს.

იანვარში თბილისში, ჯავახეთის ქუჩაზე, ყოფილმა ქმარმა ქალი დაჭრა. მომხდარიდან სამ დღეში ფოთში ისევ ყოფილმა ქმარმა დაჭრა ქალი. მომდევნო თვეში ცოლი, რომელიც მოძალადისგან თავის დაღწევას სამტრედიის სამოქალაქო რეესტრში განქორწინების გზით ცდილობდა, ადგილზე მოკლეს. მარტში ჭიათურაში, ხალხმრავალ ადგილას, ბავშვთან ერთად თავშეფარებულ ქალს ქმარი თავს დაესხა და სცემა. მეორე დღეს ხაშურში, ასევე, ხალხმრავალ ადგილზე ქალი ყოფილმა ქმარმა მუცლის არეში დანით დაჭრა.