საკონსტიტუციო სასამართლოს ახალი თავმჯდომარე ზაზა თავაძე საკუთარ გასაჯაროვებულ ქონებრივ დეკლარაციაზე, კვირის პალიტრასთან ინტერვიუში განმარტებებს აკეთებს. მისი თქმით, იგი მხოლოდ ერთ ბინას ფლობს მაყაშვილის ქუჩაზე და სხვა უძრავი ქონება არ აქვს:

"ამჟამად მე და ჩემი მეუღლე ვფლობთ მხოლოდ ერთ 125მ2 ბინას მაყაშვილის ქუჩაზე რომელიც 140 ათას დოლარად შევიძინეთ. გავყიდეთ ბინა, რომელშიც ადრე ვცხოვრობდით და დავამატე გარკვეული დანაზოგი. სხვა უძრავი ქონება არ გამაჩნია.

ბათუმში გადმომეცა სახელმწიფო საკუთრებაში არსებული ბინა. იქ ცხოვრება ჩვენთვის არ იყო მოსახერხებელი და გავყიდეთვაპირებ ბათუმში შევიძინო სხვა ბინა რომელიც უფრო პრაქტიკული იქნება. სწორედ ამით აიხსნება ჩემი მეუღლის ანაბარზე გარკვეული თანხის არსებობა. ბინა წარმოადგენდა ჩემს საკუთრებას და მის გასასხვისებლად შეზღუდვა არ მქონდა. რაც მთავარია ამას არ გამოუწვევია სახელმწიფოს მხრიდან დამატებითი ხარჯების გაწევა. ასეთი ქმედება განახორციელა ზოგიერთმა სხვა მოსამართლემაც და არ გამხდარა სპეკულაციების საგანი".

მისივე განცხადებით, სამოსამართლეო საქმიანობაზე გავლენას არ ახდენს მისი იარაღთან დამოკიდებულებაც:

"იარაღისადმი სიყვარული ცოტა გადაჭარბებულია. ვფლობ რამდენიმე სანადირ თოფს. ნადირობა ჩემი ჰობია, თუმცა ეს გავლენას არ ახდენს სამოსამართლეო საქმიანობაზე".