ეკონომიკის მინისტრის, ნათია თურნავას განცხადებით, მთავრობამ ე.წ. რიყის დოქების 95 მლნ ლარად გაყიდვა გადაწყვიტა. მისი თქმით, აუქციონი მომდევნო კვირას დაიწყება.

თურნავა განმარტავს, რომ ე.წ. დოქების ფასი სამხარაულის ეროვნული ექსპერტიზის ბიუროს მიერ არის შეფასებული და გათავალისწინებულია ის, რომ ობიექტის მშენებლობა "საკმაოდ ძვირი დაჯდა".

"სანამ არ გაიმართება აუქციონი, ჩვენ გვიჭირს იმის თქმა, რამდენად ობიექტურია ეს ფასი და რამდენად რელევანტურია ბიზნესი მოთხოვნების მიმართ... ჩვენ იმედი გვაქვს, რომ მოიძებნება დაინტერესებული ბიზნეს ჯგუფები", — განაცხადა მან.

მისივე თქმით, ობიექტი ტურისტულად მიმზიდველ ადგილას არის და თუ ის პრივატიზების გზით გაიყიდება, ბიზნესთან შეთანხმებით "სწორ გამოყენებას" უპოვიან.

"საბოლოო ჯამში, უფრო ყაირათაიანად მოვიხმართ იმ რესურსებს, რაც დაიხარჯა ამ შენობაში", — განაცხადა მან.

მინისტრის თქმით, ბიზნეს "არ კარნახობენ", თუ რა დანიშნულება უნდა მისცენ შენობას, მაგრამ ვარაუდობენ, რომ ეს უნდა იყოს "ცერემონიული ტიპის".