ინგლისელმა მსახიობმა, რობერტ პატინსონმა მაყურებლების დიდ ნაწილს თავი ჯერ ჯადოსნური სამყაროზე გადაღებული საკულტო ფილმების სერიის მეოთხე ნაწილში — ჰარი პოტერი და ცეცხლოვანი თასი — სედრიკ დიგორის ტრაგიკული როლის შესრულებით, შემდეგ კი ბინდის საგით ცნობილ ფილმებში რომანტიკოსი ვამპირის განსახიერებით დაამახსოვრა.

ამის შემდეგ მსახიობი აშკარად ცდილობდა, რომ ჰოლივუდურ მაღალბიუჯეტიან პროექტებს გარიდებოდა და უფრო მეტად არტჰაუს ფილმებში ეთამაშა, რომლებიც ძირითადად უცნაური სცენარებითა და ჟანრებით გამოირჩეოდა.

სულ ახლახანს BBC-სთან მიცემულ ინტერვიუში მსახიობმა სწორედ თავის ამ პროფესიულ არჩევანზე ისაუბრა. მისი თქმით, განვილილი კარიერული გზა მის პიროვნულ ხასიათს კარგად შეესაბამება:

"როცა წვეულებაზე ვიღაც მეტისმეტად ცდილობს, რომ სხვები გაართოს, ამან შეიძლება მართლა გაგამხიარულოს, მაგრამ ამავდროულად ხვდები, რომ ასეთი ტიპები მომაბეზრებელი, უაზრო ადამიანები არიან. ხოლო ის, ვინც უფრო თავისთვისაა და ყველაფერზე დამოუკიდებელი ხედვა აქვს, უფრო საინტერესო მოსაუბრე აღმოჩნდება ხოლმე. ფილმებსაც სწორედ ასე ვაფასებ".

რობერტ პატინსონი ჯოშ და ბენი საფდების ფილმში Good Time (2017).

ფოტო: A24

რობერტ პატინსონმა გასულ წელს არაერთ საინტერესო პროექტში მიიღო მონაწილეობა, თუმცა მათგან გამორჩეული რობერტ ეჯერსის The Lighthouse იყო, რომლის პრემიერაც კანის კინოფესტივალზე შედგა და კრიტიკოსების დიდი მოწონებაც დაიმსახურა.

როგორც აღმოჩნდა, თავად მსახიობს ჰქონდა დიდი სურვილი, რომ ამ ფილმის რეჟისორთან ეთანამშრომლა:

"The Witch რობერტ ეჯერსის სადებიუტო ფილმი იყო, თუმცა მან მოახერხა, რომ მცირე ბიუჯეტით ამბიციური, აკადემიური, სრულყოფილი და ამავდროულად ძალიან საშიში სურათი გადაეღო. მე მას დავუკავშირდი და ჩვენი ერთ-ერთი ბოლო შეხვედრისას ვუთხარი, რომ მასთან ერთად რაღაც ძალიან გიჟური რამის გაკეთება მინდოდა".

რობერტ პატინსონი ფილმში The Lighthouse.

ფოტო: A24

The Lighthouse მართლაც საკმაოდ "შეშლილი" ფილმი გამოდგა, თუმცა, 2019 წელი მსახიობს კარგს არაფერს უქადდა, რადგან ერთი სამომავლო პროექტიც კი არ იყო მის გეგმებში:

"გასული წელი უსამსახუროდ დავიწყე. მახსოვს, ჩემმა აგენტმა მითხრა, რომ არავინ აპირებდა ჩემთან მუშაობას — შენმა ფილმებმა კარგი შეფასებები დაიმსახურა, თუმცა ჰიტები არ გამხდარა. ერთი კვირის შემდეგ კი მოულოდნელად დამირეკა: "გინდა კრისტოფერ ნოლანის ფილმში ითამაშო?"

მალე ნოლანის ახალ ფილმში Tenet რობერტ პატინსონს მართლაც ვიხილავთ. ფილმის პრემიერა 17 ივლისს არის დაგეგმილი.

რობერტ პატინსონი ჯონ დევიდ ვაშინგტონთან ერთად ფილმში Tenet

ფოტო: Warner Bros. Pictures

წინასწარ შეგვიძლია ვივარაუდოთ, რომ ნოლანის ახალი ფილმი ნამდვილი ჰიტი გახდება. ამავდროულად 2021 წელს რობერტ პატინსონს ბეტმენის როლშიც ვიხილავთ. ამავე ინტერვიუში მსახიობმა აღნიშნა, რომ ეს ორივე ფილმი მის მიერ მანამდე ნახსენებ გემოვნებას აცდენილი სულაც არ არის: მისი თქმით, ნოლანი "ინდი კინოს შემოქმედია", ხოლო ბეტმენის შესახებ გადაღებული შემდეგი ფილმი "შეშლილი და ნორმებიდან ამოვარდნილი" იქნება.

მეტიც, რობერტ პატინსონი მიიჩნევს, რომ ბინდის საგაც საავტორო კინოს უჩვეულო წარმომადგენელია:

"არავის გაუცნობიერებია, რომ ბინდი არტჰაუსი იყო. რამდენიმე წელში ადამიანები მოულოდნელად გაიაზრებენ ამას: "აჰ, ეს ხომ არტჰაუს კინო იყო! როგორ ვერ შევნიშნე!"

კრისტენ სტიუარტი და რობერტ პატინსონი ბინდის საგის ფილმში.

ფოტო: Summit Entertainment

ისღა დაგვრჩენია, მსახიობის მომავალ ფილმებს დაველოდოთ და მისი სამსახიობო განვითარება უფრო თამამად მას შემდეგ შევაფასოთ.