2017 წელს გამოსულ სერიალ Big Little Lies-ში ოსკაროსანმა მსახიობმა, ნიკოლ კიდმანმა დაამტკიცა, რომ ნიჭიერ ხელოვანს თანაბრად ოსტატურად შეუძლია შეასრულოს როლი კინოსა და სატელევიზიო შოუში.

ოჯახური ძალადობის მსხვერპლი ქალის, სელესტი რაითის როლის შესრულების შემდეგ, რომელმაც მსახიობს ემის ჯილდო მოუტანა, ნიკოლ კიდმანი HBO-ს კიდევ ერთ ახალ სერიალში მონაწილეობს, რომლის ტიზერიც სულ რამდენიმე დღის წინ გამოვიდა.

The Undoing — ასე ჰქვია ახალ სერიალს, რომელიც ამერიკელი მწერლის, ჯინ კორელიცის 2014 წელს გამოქვეყნებული გახმაურებული ბესტსელერის, You Should Have Known-ის მიხედვით გადაიღეს.

წიგნის მსგავსად სერიალი თერაპევტი გრეისი რაინჰარტის შესახებ მოგვითხრობს, რომლის ცხოვრებაშიც მოულოდნელად ერთმანეთზე უფრო შოკის მომგვრელი მოვლენები ვითარდება. სერიალში ამ მთავარი გმირის როლს სწორედ ნიკოლ კიდმანი ასრულებს, მას პარტნიორობას კი ჰოლივუდის კიდევ ერთი ვარსკვლავი, ჰიუ გრანტი უწევს.

აღსანიშნავია, რომ ამ სატელევიზიო შოუს იდეის ავტორი და სცენარისტი დევიდ კელია, რომელმაც მანამდე ასევე მონაწილეობა მიიღო Big Little Lies-ის შექმნაში. სერიალი კი ოქროს გლობუსისა და ემის მფლობელმა რეჟისორმა, სუზან ბირმა გადაიღო, რომელიც ასევე რეჟისორია ნეტფლიქსის გახმაურებული ფილმისა Birdbox.

HBO-ს ახალი მინისერიალი ექვსი ეპიზოდის ხანგრძლივობის იქნება და მისი პრემიერა მაისში შედგება.