2019 წელს უოლტ დისნეის სტუდიამ ასევე ერთ-ერთი ყველაზე ცნობილი კინოსტუდია — 20th Century Fox $71.3 მილიარდად შეიძინა. სულ ცოტა ხნის წინ კი მედიაში გავრცელდა ინფორმაცია, რომ რებრენდინგის გამო დისნეი შვილობილ კომპანიას სახელს უცვლის: აქამდე ყველასთვის კარგად ნაცნობ სახელწოდებას სიტყვა Fox ჩამოშორდება.

დისნეის ცვლილების ოფიციალური მიზეზებს შესახებ არ უსაუბრია, თუმცა გავრცელებული ინფორმაციის თანახმად, ეს ნაბიჯი ცნობილ ამერიკულ ტელეარხ, Fox News-თან ასოციაციას უკავშირდება: დისნეის არ სურს, რომ მის მფლობელობაში მყოფი კომპანია მემარჯვენე პოლიტიკით ცნობილ მედიას დაუკავშირონ.

კომპანია 20th Century Fox 1935 წელს შეიქმნა, 80-იან წლებში კი ის ცნობილმა ავსტრალიელმა მედიამაგნატმა, რუპერტ მერდოკმა შეიძინა. მოგვიანებით, 1996 წელს შეიქმნა სატელევიზიო არხი Fox News, რომელიც მალე ამერიკაში ყველაზე პოპულარული ტელეარხი გახდა.

რუპერტ მერდოკი ცნობილია თავისი კონსერვატიული შეხედულებებითა და აშშ-ს ამჟამინდელი პრეზიდენტის, დონალდ ტრამპის მხარდაჭერით, დისნეის კი, რომელსაც პოლიტიკურად ნეიტრალური პოზიცია უჭირავს, არ სურს, რომ მისმა მომხმარებლებმა კავშირი დაინახონ მათ შორის.

რუპერტ მერდოკი დონალდ ტრამპთან ერთად.

ფოტო: REUTERS

დისნეიმ Fox ამოიღო კიდევ ერთი კომპანიის სახელწოდებიდან — Fox Searchlight Pictures. აღსანიშნავია, რომ უკვე ორივე კომპანიის თანამშრომლების მეილებიდანაც გაქრა სიტყვა Fox: ამიერიდან ამ ორი კომპანიის თანამშრომლები @20thcenturystudios.com-სა და @searchlight.com-ის მისამართების მქონე ელექტრონული ფოსტით ისარგებლებენ.

აქამდე 20th Century Fox-ის სახელით ცნობილი კომპანია ისეთი ცნობილი ფილმების მწარმოებელი იყო, როგორებიცაა ავატარი, ტიტანიკი, მარტო სახლში და დედპული. ამიერიდან კი ყველასთვის კარგად ნაცნობი ფილმების შესავალ კადრში, როცა საზეიმო მუსიკის თანხლებით კომპანიის ლოგო ჩანდა, მხოლოდ 20th Century-ს წარწერას ვიხილავთ.