სულ ცოტა ხნის წინ სოციალურ ქსელებში ახალი კამპანია წამოიწყეს, რომლის მიზანიც სუდანის ერთ-ერთ პარკში მყოფი ხუთი აფრიკული ლომის გადარჩენაა.

ლომები სუდანის დედაქალაქში, ხარტუმში მდებარე ალ ქურეშის პარკში იმყოფებიან, სადაც, გავრცელებული ინფორმაციის თანახმად, გალიებში გამოკეტილებს კვირების განმავლობაში შესაბამისი საკვები და მედიკამენტები არ მიეწოდებათ.

რამდენიმე დღის წინ პარკს ოსმან სალიჰი სტუმრობდა და ლომების გაუსაძლისი მდგომარეობის ხილვის შემდეგ გადაწყვიტა, რომ ონლაინ კამპანია #SudanAnimalRescue (სუდანში ცხოველების გადარჩენა) წამოეწყო, რათა იქ არსებული ვითარების შესახებ უფრო მეტ ადამიანს გაეგო და ცხოველების დახმარება ეცადა.

"ცხოველებს არა მხოლოდ საკვები, არამედ ფრთხილი და სპეციალური მოვლა სჭირდებათ, რათა ისინი იმ დაავადებებისგან განიკურნონ, რომლებიც, სავარაუდოდ, ცუდი კვებისა და დაბინძურებული ხორცის გამო დაემართათ", — ვკითხულობთ ოსმან სალაჰის პოსტში.

The Guardian-ს პარკის წარმომადგენლებმა და ვეტერინარებმა განუცხადეს, რომ სუდანში არსებული ეკონომიკური კრიზისის გამო ცხოველებისთვის საჭირო რაოდენობის საკვების მიწოდებას ვეღარ ახერხებენ.

"იმის გამო, რომ ხანდახან საკვები საერთოდ არ აქვთ, ჩვენი ფულით ვყიდულობთ მას, რათა მცირედით მაინც გამოვკვებოთ ისინი", — განაცხადა პარკის მენეჯერმა.

ფოტო: ASHRAF SHAZLY / GETTY

პარკის ერთ-ერთი თანამშრომლის განცხადებით, "ლომები სხვადასხვა დაავადებით იტანჯებიან და მალე კვების უკმარისობის გამო დაიხოცებიან".

პარკში არსებული მდგომარეობის შესახებ გამოქვეყნებული პოსტიდან მეორე დღეს ოსმან სალაჰმა ინფორმაცია გაავრცელა, რომ ერთი ძუ ლომი გარდაიცვალა.

ფოტო: ASHRAF SHAZLY / GETTY

საკმაოდ მძიმე მდგომარეობის მიუხედავად, საერთაშორისო დაინტერესების შემდეგ პარკში პოზიტიური ცვლილებები დაიწყო: არაერთმა ადამიანმა გამოთქვა ფინანსური დახმარების სურვილი, ხოლო პარკის ადმინისტრაციამ აქტიურად დაიწყო ლომების გადასარჩენად საჭირო ნაბიჯების გადადგმა.

"სხვადასხვა დონორმა პარკს ცხოველების საკვებად ახალი ხორცი შესწირა", — წერს ოსმან სალაჰი.

ბუნების დაცვის საერთაშორისო კავშირის მიერ ლომები ერთ-ერთ ყველაზე დაუცველ სახეობადაა აღიარებული, რომლის პოპულაციაც მცირდება: დღეს სულ მხოლოდ 20 000 ცოცხალი ლომია დედამიწაზე.