ჰოლივუდის ყოფილ პროდიუსერ ჰარვი ვაინშტაინს გაუპატიურებასა და სექსუალურ ძალადობაზე ლოს-ანჯელესის სასამართლომ ბრალი წარუდგინა.

ლოს-ანჯელესში გამოძიება 2013 წლის ინციდენტზე გრძელდება, რომელშიც ორი მსხვერპლი ქალი ფიგურირებს. შესაძლო დანაშაული ვაინშტაინმა 2-დღიან მონაკვეთში ჩაიდინა და მისი დამტკიცების შემთხვევაში, ყოფილ გავლენიან პროდიუსერს 28-წლიანი პატიმრობა ემუქრება.

ბრალის წარდგენის დღეს ვაინშტაინი ნიუ-იორკში, გაუპატიურებისა და ძალადობის სხვა საქმეებზე გამართულ სასამართლოზე გამოჩნდა. ის ბრალდებებს უარყოფს და აცხადებს, რომ მისი ყველა ურთიერთობა ორმხრივი თანხმობის საფუძველზე შედგა. თუმცა დასძენს, რომ "უამრავ ადამიანს ტკივილი მოუტანა".

"გვჯერა მტკიცებულებები დაგარწმუნებთ, რომ ბრალდებულმა ძალაუფლება და გავლენა გამოიყენა მსხვერპლებზე ზემოქმედებისთვის და შემდეგ, მათ წინააღმდეგ დანაშაული ჩაიდინა", — განაცხადა ბრალდების მხარის წარმომადგენელმა ჯეკი ლეისიმ ლოს-ანჯელესის სასამართლოზე.

მან ასევე ის ქალები შეაქო, რომლებსაც მისი სიტყვებით გამბედაობა და სიმამაცე ეყოთ საკუთარი გამოცდილების მოსაყოლად:

"იმედი მაქვს, რომ სექსუალური ძალადობის ყველა მსხვერპლი იპოვის ძალას და განკურნებას, მას შემდეგ რაც ამაზე განაცხადებენ".

ლოს-ანჯელესის პროკურატურის მიხედვით, ვაინშტაინმა 2013 წლის 18 თებერვალს ქალის სასტუმრო ოთახში ძალის გამოყენებით შეაღწია და შემდეგ ის გააუპატიურა, მომდევნო დღეს კი ბევერლი ჰილზის სასტუმროში სხვა ქალზე იძალადა. პროკურატურა გირაოს სახით 5 მილიონი დოლარის დაწესებას ითხოვს.

ამ საქმეებზე ვაინშტაინის წინააღმდეგ არსებული ბრალდებები მოიცავს ძალის გამოყენებით გაუპატიურებას, ძალის გამოყენებით ორალურ სქესობრივ აქტს, სექსუალური ხასიათის იძულებით ქმედებებსა და ძალის გამოყენებით პენეტრაციას.

ვაინშტაინი სექსუალურ შევიწროებაში, ძალადობასა და მათ შორის გაუპატიურებაში 80-ზე მეტმა ქალმა დაადანაშაულა. პირველად ვაინშტაინი საჯაროდ The New York Times-ის 2017 წლის სტატიის საშუალებით ხუთმა ქალმა ამხილა, რასაც ძალადობის წინააღმდეგ დაუგეგმავი კამპანიები, #MeToo და Times Up მოჰყვა.

ვაინშტაინის საქმეებს ლოს-ანჯელესისა და ნიუ-იორკის გარდა, ლონდონის პოლიციაც იძიებს. ხუთი სხვადასხვა ბრალდების დამტკიცების შემთხვევაში, ვაინშტაინმა შეიძლება ციხეში მთელი ცხოვრება გაატაროს.

ასევე იხილეთ: