რეგიონალური განვითარებისა და ინფრასტრუქტურის მინისტრის, მაია ცქიტიშვილის თქმით, გუდაურში წყალმომარაგების პრობლემების მოგვარებას გაზაფხულიდან დაიწყებენ. მისი თქმით, "რედკოს" დასახლებაში გაფართოება იგეგმება, რაც მათთვის ახალი გამოწვევაა.

"ეს ნიშნავს ჩვენთვის ახალ გამოწვევას, რომ აუცილებელია ინფრასტრუქტურის განვითარების ტემპი დავაჩქაროთ. ამიტომ, კომპანიის ახალ ხელმძღვანელთან ერთად, სწორედ ამ სამუშაოებს ვნახავთ და დავგეგმავთ, რომ უკვე გაზაფხულის სეზონიდანვე დავიწყოთ წყალმომარაგების გაუმჯობესების სამუშაოები გუდაურში, რათა კლიმატურ ცვლილებებს, რაც სავარაუდოდ მომავალში იქნება, უფრო მომზადებული შევხვდეთ", — თქვა მაია ცქიტიშვილმა.

გუდაურში ვიზიტის დროს მინისტრმა, ასევე, აღნიშნა, რომ წყალმომარაგების პრობლემის რეალური მიზეზი უნალექო შემოდგომაა. ბორჯომის მერი კი ფიქრობს, რომ ბაკურიანში წყლის დეფიციტი დამსვენებელთა სიმრაველემ გამოიწვია.

დღეს, ბაკურიანსა და გუდაურში წყალმომარაგების პრობლემის შემდეგ გაერთიანებული წყალმომარაგების კომპანიის დირექტორი, ეკატერინე გალდავა გათავისუფლდა.

ბაკურიანსა და გუდაურში წყლის მიწოდების პრობლემა თითქმის ერთი კვირაა მოუგვარებელია. ტურისტული სეზონის პიკში, ბაკურიანში სასტუმროების ნაწილს წყალი გრაფიკით მიეწოდება, ნაწილს კი წყალს სახანძრო მანქანები აწვდის. გუდაურთან დაკავშირებით გაერთიანებული წყალმომარაგების კომპანია აცხადებდა, რომ პრობლემა გუდაურში მშრალი კლიმატური პირობების გამო წყლის მარაგის შემცირებამ და სეზონზე გაზრდილი მოხმარების შედეგად წნევის ვარდნამ გამოიწვია.

ტურიზმი საქართველოს ეკონომიკის შემოსავლის ერთ-ერთი ყველაზე დიდი წყაროა. მეტწილად, სწორედ მასზეა დამოკიდებული ეროვნული ვალუტის სიმყარე და ქვეყნის განვითარება.