2019 წლის უდავოდ ერთ-ერთი ყველაზე გამორჩეული სატელევიზიო შოუ HBO-ს ახალი სერიალი Watchmen-ია, რომელიც ამავე სახელწოდების მქონე 2009 წელს გადაღებული გახმაურებული ფილმის ერთგვარ სიქველს წარმოადგენს.

15 დეკემბერს სერიალის პირველი სეზონი მეცხრე ეპიზოდის გამოსვლით დასრულდა. გარდა იმისა, რომ სერიალმა არაერთი კრიტიკოსის დადებითი შეფასება დაიმსახურა და მაყურებლების დიდმა ნაწილმაც შეიყვარა, ის HBO-ს ერთ-ერთი ყველაზე პოპულარული პროდუქტი გახდა: მისი ბოლო ეპიზოდი პირდაპირ ეთერში 1.6 მილიონზე მეტმა მაყურებელმა ნახა.

HBO-ს მონაცემებით სერიალის თითოეული სერია დაახლოებით შვიდმა მილიონმა ადამიანმა ნახა, რაც სადებიუტო სერიალის პირველი სეზონის ერთ-ერთი საუკეთესი მაჩვენებელია: უკეთესი შედეგი მხოლოდ 2017 წელს გამოსულ სერიალ Big Little Lies ჰქონდა.

ფოტო: HBO

ამ ყველაფრისა და სეზონის შთამბეჭდავი ფინალის გათვალისწინებით, ბუნებრივია, რომ მაყურებლები შოუს გაგრძელებას მოუთმენლად ელიან, თუმცა სერიალის მთავარმა სცენარისტმა, დეიმონ ლინდელოფმა ჯერ კიდევ სეზონის დამთავრებამდე განაცხადა, რომ მას Watchmen-ის სიუჟეტური ხაზი მხოლოდ ერთ სეზონზე ჰქონდა გათვლილი და გაგრძელებაზე არ ფიქრობდა.

მიუხედავად ამისა, შოუ იმდენად წარმატებული აღმოჩნდა, რომ, ალბათ, HBO ასე მარტივად არ დააპირებს ამ წარმატებული პროექტის ასე მალე დასრულებას. სულ ცოტა ხნის წინ მიცემულ ინტერვიუში დეიმონ ლინდელოფმაც სწორედ გაგრძელების შესაძლო ალტერნატივებზე ისაუბრა:

"ამაზე საუბარი ჯერ ნაადრევია. თუ შემდეგი სეზონი იქნება, საერთოდ როგორი უნდა იყოს ის? არ ვამბობ, რომ მე ეს არ მსურს ან შოუ საერთოდ არ უნდა გაგრძელდეს, უბრალოდ ყველა იდეა, რაც კი აქამდე მქონდა, პირველი სეზონისთვის დავხარჯე. შესაბამისად, რამდენიმე თვე მაინც დამჭირდება, რომ შესაძლო ახალ იდეებზე კარგად დავფიქრდე".

ფოტო: HBO

როგორც აღმოჩნდა, Lost-სა და Leftovers-ს სცენარის ავტორს თავადაც სურს, რომ Watchmen-ის გაგრძელება იხილოს:

"HBO-ს ვეთანხმები, რომ სერიალი უნდა გაგრძელდეს. შეიძლება ეს ერთი, ორი ან თუნდაც ოთხი წლის შემდეგ მოხდეს, მაგრამ მაინც ძალიან მინდა ვნახო ამ ისტორიის გაგრძელება. ყოველთვის ვამბობდი, რომ Watchmen-ს ისეთ შოუდ წარმოვიდგენდი, როგორიცაა Fargo ან True Detective. ანთოლოგია შესაფერისი გამოსავალი იქნება, რომელიც სხვადასხვა პერსონაჟების ან სულაც განსხვავებულ დროში განვითარებული მოვლენების შესახებ მოგვითხრობს".

როგორც ჩანს, სკეპტიკური მოლოდინების მიუხედავად, საკმაოდ დიდი ალბათობა არსებობს, რომ ბოლო წლების ერთ-ერთი გამორჩეული სატელევიზიო შოუს გაგრძელება უახლოეს წლებში კვლავ ვიხილოთ.