2019 წელს კინოსამყაროში ნამდვილად ერთ-ერთი ყველაზე მნიშვნელოვანი და ხმაურიანი მოვლენა კვენტინ ტარანტინოს მეცხრე ფილმის, Once Upon a Time in Hollywood-ის გამოსვლა იყო.

გარდა იმისა, რომ ფილმი რეჟისორის შემოქმედებაში ერთ-ერთი ყველაზე წარმატებული პროექტი გამოდგა კინოგაქირავებიდან მიღებული შემოსავლებით, ის საერთაშორისო სკანდალში გაეხვა და ამის გამი ჩინეთში მისი პრემიერაც ჩაიშალა.

ტარანტინოს ამ ხმაურიან ფილმში მთავარ როლებს ჰოლივუდის ყველაზე ცნობილი კაცი მსახიობები, ლეონარდო დიკაპრიო და ბრედ პიტი ასრულებენ. ოსკარების დაჯილდოების მოახლოებასთან ერთად მაყურებლები აქტიურად განიხილავდნენ, თუ ვის წარადგენდნენ ამ ორი მსახიობიდან კაცის მთავარი როლის ნომინაციაზე და ვის - მეორეხარისხოვანი როლის კატეგორიაში.

სულ ცოტა ხნის წინ ტარანტინოს ამ კინოსურათის მწარმოებელმა კომპანიამ, Sony Pictures-მა ოფიციალურად დაადასტურა, რომ კაცის საუკეთესო როლის ნომინაციაში ლეონარდო დიკაპრიო წარადგინეს, მეორეხარისხოვანი როლისთვის კი ბრედ პიტი.

ლეონარდო დიკაპრიოს უკვე აქვს ერთი ოსკარი მოპოვებული 2016 წელს ფილმ The Revenant-ში შესრულებული როლისთვის, ბრედ პიტმა კი ჯერ-ჯერობით ამ გავლენიანი ჯილდოს მოპოვება ვერ მოახერხა. თუმცა, როგორც ვარაუდობენ, წელს სწორედ ბრედ პიტს უფრო აქვს ოსკარის ცერემონიალზე გამარჯვების შანსი.

2020 წლის ოსკარების დაჯილდოებაზე ლეონარდო დიკაპრიოს სავარაუდოდ კონკურენციას გაუწევენ რობერტ პატინსონი ფილმ The Lighthouse-ში შესრულებული როლით და ხოაკინ ფენიქსი წლევანდელი ერთ-ერთი უდაოდ ფავორიტი ფილმით Joker. ბრედ პიტთან ერთად კი მეორეხარისხოვანი როლის ნომინაციაში იბრძოლებენ ტიმოთი შალამე ფილმიდან The King და უილემ დეფო ფილმით The Lighthouse.

ოსკარების მომავალი დაჯილდოების ნომინაციებში მოხვედრილი ფინალისტების ვინაობა 2020 წლის 13 იანვარს გახდება ცნობილი, თავად დაჯილდოების ცერემონიალი კი 9 თებერვალს გაიმართება.