კომიქსების სამყაროში ერთ-ერთი ყველაზე მნიშვნელოვანი სუპერგმირის, Wonder Woman-ის როლის მომაჯადოვებლად შესრულების შემდეგ ამჯერად გალ გადოტი რეალური, ისტორიაში ერთ-ერთი ყველაზე შთამბეჭდავი გმირის როლს ითამაშებს.

ირენა სენდლერი პოლონელი მედდა იყო, რომელმაც მეორე მსოფლიო ომის დროს ნამდვილი სასწაული ჩაიდინა: მან 2 500 ებრაელ ბავშვს ყალბი პასპორტები დაუმზადა და გესტაპოს დაუნდობელ დევნას განარიდა. ამის გამო ის 1943 წელს დააპატიმრეს და აწამეს, თუმცა სენდლერმა ბავშვების ადგილმდებარეობის შესახებ ინფორმაცია მაინც არ გასცა.

სწორედ ამ დაუჯერებელ ისტორიაზე გადაწყვიტა Warner Bros.-მა ფილმის გადაღება, რომელსაც ისტორიის მთავარი გმირის სახელი - ირენა სენდლერი ერქმევა, მის როლს კი გალ გადოტი შეასრულებს.

ფილმის გამოსვლის თარიღი ჯერ-ჯერობით უცნობია.