გასულ თვეში ბულგარეთის დედაქალაქში, სოფიას ერთ-ერთ ცენტრალურ ქუჩაზე ჩოგბურთის მოედანი გამოჩნდა.

არა, იქ არც სპორტული ჩემპიონატის მოწყობას აპირებდა ვინმე და არც მაცხოვრებლების თვითნებობასთან გვქონია საქმე — ჩოგბურთის მოედანზე წამოკოტრიალებული ორი დაღლილი მეტოქე სინამდვილეში დიდ პერფორმანსში "ვის უნდა ჩოგბურთი?" მონაწილეობდნენ.

პერფორმანსი ქალაქის ცენტრში გაუჩერებელი სარეკონსტრუქციო სამუშაოების წინააღმდეგ იყო მიმართული.

ფოტო: Dimitar Karanikolov

ეს ყველაფერი ივან ვიზოვის ნაციონალური თეატრის მახლობლად მოხდა, რომელიც ტურისტებისთვის სამოგზაუროდ ერთ-ერთი ყველაზე საყვარელი დანიშნულების ადგილი და მათი ინსტაგრამ ფოტოების ხშირი მუზაა.

მიუხედავად ამ ადგილის ისტორიული მნიშვნელობისა, რადგან აქვეა სოფიას სახელმწიფო უნივერსიტეტიც, გაუთავებელი სარემონტო სამუშაოების გამო, ქუჩა მუდმივად გადაკეტილი იყო.

პრობლემის გადასაჭრელად კი დიმიტრი კარანიკოლოვმა და მომჩილ ზახარიევმა ქუჩის ცენტრში პერფორმანსი მოაწყვეს და მისი ამსახველი ფოტო ინტერნეტში ატვირთეს — ჩანაფიქრმა ქაოტური მშენებლობების წინააღმდეგ, ნამდვილად გაამართლა, რადგან გარდა იმისა, რომ სახელდახელოდ შექმნილი ჩოგბურთის მოედნის შესახებ ინფორმაცია ორმა ადგილობრივმა არხმა გააშუქა, ამბავი ინტერნეტსაც ვირუსივით მოედო.

საბედნიეროდ, ხელისუფლებამაც არ დააყოვნა და ქალაქის ცენტრში სარემონტო სამუშაოების დროულად დასასრულებლად დანიიდან ურბანული კონსულტანტი მოიწვია, ქალაქელებს კი ნაკლებ საპარკინგე ადგილსა და მეტ გამწვანებას დაჰპირდნენ.