სტატია შეიცავს სპოილერებს Big Little Lies-ის მეორე სეზონიდან, ასე რომ, თუ ძალიან საინტერესო 7 ახალი სერიისთვის ჯერ ვერ მოიცალეთ და კითხვას მაინც განაგრძობთ, ყველაფერი მერილ სტრიპს დააბრალეთ.

დიდი პატარა ტყუილების მეორე სეზონი დასრულდა და ფანებს ერთი კითხვა აწუხებთ — დაწერს ლიან მორიარტი ახალი სეზონისთვის სცენარს? ან საერთოდ, უნდა ველოდოთ თუ არა მონტერეის ხუთეულზე ახალ სერიებს?

ამ კითხვაზე საბოლოო პასუხი ჯერ არ არსებობს, თუმცა ვიცით, რომ გამოდის DVD-ის დამატებითი მასალები, რომელშიც სხვა უცნობ კადრებთან ერთად, ნაყინის სროლის ცნობილ სცენასაც ვნახავთ.

და მაინც, ბუნდოვანმა ფინალურმა სცენამ, რომელშიც პერის სიკვდილის მოწმეები პოლიციის შენობაში შედიან, მაყურებელს იმედი გაუჩინა, რომ ახალი სერიები იქნება, რადგან დიდი პატარა ტყუილების მთავარი გმირების ბედზე სწორედ ამ სცენამ უამრავი კითხვის ნიშანი გააჩინა.

ამ სტატიაში თავი მოვუყარეთ სერიალთან დაკავშირებული ყველა ადამიანის პასუხს, კითხვაზე, ექნება თუ არა BLL-ს მესამე სეზონი.

ნიკოლ კიდმანი

სელესტის როლის შემსრულებელი და სერიალის პროდიუსერი

"სიამოვნებით მივიღებდი მონაწილეობას [დიდი პატარა ტყუილების] მესამე სეზონში, რადგან იდეები არსებობს. თუმცა სერიალს ყველა დანარჩენი მსახიობის, თუნდაც ბავშვების, გარეშე არ გავაგრძელებთ".

შეილინ ვუდლი

ჯეინის როლის შემსრულებელი

ფინალური სერიის შემდეგ, შეილინმა ინსტაგრამზე დაწერა, რომ შოუს შემქმნელებისა და მაყურებლების მადლიერი იყო. როდესაც ფანმა კომენტარებში ჰკითხა, იქნებოდა თუ არა მესამე სეზონი, შეილინმა მოკლედ უპასუხა:

"იმედი მაქვს".

პურნა ჯაგანათანი

სელესტის ადვოკატის როლის შემსრულებელი

თუ მეორე სეზონს უყურეთ, გემახსოვრებათ სელესტის ადვოკატი, რომელმაც სასამართლო დარბაზში თითქმის არაფერი გააკეთა თავისი კლიენტის დასაცავად.

თუმცა, თავად მსახიობი საკმაოდ ენაწყლიანი აღმოჩნდა. მან Vanity Fair-თან ინტერვიუში თქვა, რომ სცენარის მიხედვით, მეორე სეზონში ერთ-ერთი მთავარი პერსონაჟი უნდა მომკვდარიყო. ეს შემზარავი ბედი კი მონტერეის ხუთეულიდან ერთ-ერთს უნდა გაეზიარებინა.

საბედნიეროდ, HBO-მ ეს გადაწყვეტილება არ მიიღო, თუმცა პერსონაჟი, რომელიც უნდა მომკვდარიყო, სავარაუდოდ ბონი (ზოი კრავიცი) იქნებოდა.

"მე ვიცოდი სრული სცენარი და როდესაც ფინალს ვუყურე, პირველი რაც გავიფიქრე ის იყო, რომ მესამე სეზონიც გვექნებოდა. ფინალში ის სცენარი არ იყო, რაც მე წავიკითხე, ერთ-ერთი პერსონაჟი უნდა მომკვდარიყო კიდეც. თუმცა ასე არ მოხდა", — თქვა მან.

ჯაგანათანი ვარაუდობს, რომ მეორე სეზონის სცენარის შეცვლა შესაძლოა იმას ნიშნავდეს, რომ მესამე სეზონისთვის ახალი სცენარი დაიწერება.

კეისი ბლოისი

HBO-ს პრეზიდენტი

"მიყვარს ამ გუნდთან მუშაობა, მათთან ნებისმიერ პროექტში ვითამაშებდი. თუმცა რეალურად მათ შორის არიან ძალიან დაკავებული მსახიობები, რომლებიც ჰოლივუდში მუშაობენ. რამდენიმე მათგანთან გვაქვს შეთანხმება — ნიკოლი [კიდმანი] ჩვენს ახალ შოუში იღებს მონაწილეობას [The Undoing]. თუ ისინი მოვლენ ჩემთან და მეტყვიან, რომ [მესამე სეზონისთვის] დრო დაგეგმეს, რასაკვირველია [გადავიღებთ], თუმცა არ მგონია, რომ მესამე სეზონი რეალისტურია".

განაცხადა ბლოისმა TVLine-თან 2019 წლის დასაწყისში. სულ ცოტა ხნის წინ კი, ფინალური სერიის გამოსვლის შემდეგ, მან თქვა:

"არასდროს თქვა არასდროს. ჩემთვის ბუნდოვანია, როგორი იქნება [მესამე სეზონი], რადგან სცენარი არ გვაქვს, თუმცა ამაზე თანახმა ვარ, რადგან მათთან მუშაობა მიყვარს".

არ ვიცით ამ კომენტარებში დიდი პატარა ტყუილები თუ იმალება, მაგრამ შეგვიძლია თითები გადავაჯვარედინოთ და იმედი ვიქონიოთ, რომ HBO სელესტის, რენატას, ჯეინის, მედელინისა და ბონის ცხოვრებაში კიდევ ერთხელ შეგვაჭყიტებს.