მას შემდეგ, რაც ქართული ნაციონალური ბალეტის ხელმძღვანელი კანის ტრიუმფატორი ფილმის, And Then We Danced-ის რეჟისორმა ხელის შეშლაში დაადანაშაულა, ნინო სუხიშვილმა განაცხადა, რომ "ქართული ცეკვა კაცურია", ჰომოსექსუალი კაცი კი აქამდე სუხიშვილების ანსამბლში არ ჰყოლია.

ქართველი მხატვარი და აქტივისტი ლია უკლება სწორედ სუხიშვილის ჰომოფობიურ განცხადებას პასუხობს. როგორც ის On.ge-სთან საუბრისას ამბობს, ნახატი სამაია, რომელშიც ცეკვას კაცები ასრულებენ, სწორედ ნინოს სიტყვებით იყო ინსპირირებული.

ლია უკლებას სიტყვებით, მისთვის გაუგებარია, როგორ დაადგინა ნინო სუხიშვილმა, ჰყავდა თუ არა ანსამბლში ჰომოსექსუალი კაცი.

ხელოვანის სიტყვებით, მისი ნახატი ნიშნავს, რომ ნებისმიერ ადამიანს აქვს უფლება იყოს ისეთი, როგორიც სურს და აკეთოს ის, რაც უნდა. ის უპირისპირდება სუხიშვილის სიტყვებს იმის შესახებ, რომ ქართულ ცეკვაში კაცის დამოკიდებულება ქალის მიმართ განსაკუთრებულად ჩანს:

"ჩვენ თავი უნდა დავაღწიოთ ასეთ კლიშეებს და ვთქვათ, სიყვარული არის სიყვარული და არაფერი სხვა".

უკლებას თქმით, ნახატის გამოქვეყნების შემდეგ მიღებული გამოხმაურების დიდი ნაწილი აგრესიულია, რასაც კონსერვატიული ჯგუფების ქართული ცეკვისადმი "საკრალურ დამოკიდებულებას" უკავშირებს.

"აგრესიული შეფასებები ჩემს მიზანს არ ცვლის, ის უცვლელია: ვილაპარაკო ქალების, მშრომელების, ლგბტქი ადამიანების და სხვა ჩაგრული ჯგუფების პრობლემებზე", — ამბობს ის.

ლია უკლებას თქმით, მხარდამჭერ წერილებსაც ღებულობს, უშუალოდ თემის წევრებისგან, რაც ძალიან ახარებს.

რეჟისორმა ლევან აკინმა The Guardian-თან ინტერვიუში თქვა, რომ სუხიშვილების ხელმძღვანელმა, ნინო სუხიშვილმა ფილმს პრობლემები შეუქმნა. მან ფილმში მონაწილე მოცეკვავეები დაბლოკა და მათ უთხრა, რომ ფილმში მონაწილეობის შემთხვევაში ცეკვის შესაძლებლობა აღარ ექნებოდათ.

"ფილმის გადაღებამდე ნინო სუხიშვილს შევხვდით და მისი რეაქცია იყო: "რატომ არ შეიძლება რომ მას გოგონა შეუყვარდეს? ქართულ ცეკვაში გეი არ არსებობს!". ჩვენ შეგვეძლო, გამოგვეყენებინა მისი დახმარება, მაგრამ მან მხარი არ დაგვიჭირა. მხოლოდ ეს არ იყო, ჩვენ აღმოვაჩინეთ, რომ მან სხვა ცეკვის სტუდიებს მიმართა, ფილმიდან მოცეკვავეები დაბლოკა და მათ უთხრა, რომ ფილმში მონაწილეობის შემთხვევაში ვეღარასდროს იცეკვებდნენ", — თქვა აკინმა და აღნიშნა, რომ ეს ეფექტი გავრცელდა და მათ ფილმისთვის რამდენიმე მნიშვნელოვანი ადგილი დაკარგეს.

ნინო სუხიშვილმა Prime Time-თან ექსკლუზიურ ინტერვიუში დაადასტურა, რომ ლევან აკინს სუხიშვილების ბაზაზე ფილმის გადაღების უფლება არ მისცა:

"მე ვუთხარი, რომ ეს სუხიშვილების ბაზაზე არ გამოვა, ჯერ ერთი დატვირთული გრაფიკი გვაქვს, მეორე — ქართული ცეკვა არის კაცური... სიუჟეტი არაბუნებრივი მომეჩვენა, თორემ არანაირად ჰომოფობიური პოზიცია არ მქონია. ქართულ ცეკვაში განსაკუთრებულად ჩანს მამაკაცის დამოკიდებულება ქალის მიმართ — კდემამოსილება, ტრფობა, პატივისცემა. ბევრი ცეკვა ქალის და მამაკაცის ურთიერთობაზეა. ამიტომ რეჟისორს ვკითხე, რატომ არ გინდა ქალის და მამაკაცის სიყვარულის ისტორიაზე გადაიღო-მეთქი?"

და ჩვენ ვიცეკვეთ ლევან აკინის მიერ გადაღებული ქართულ-შვედური ფილმია გეი სიყვარულზე, რომლის მთავარი პერსონაჟებიც სწორედ ქართული ცეკვის სტუდიაში გაიცნობენ ერთმანეთს. სურათის პრემიერა კანში შედგა და წლევანდელი კინოფესტივალის საუკეთესო ფილმებში მეშვიდე ადგილი დაიკავა. სურათი ბრიტანულმა ჟურნალმა კანის საუკეთესო ფილმების სამეულშიც შეიყვანა.