პარიზის ღვთისმშობლის ტაძარში გაჩენილ ძლიერ ხანძარს ტვიტერზე ეხმაურებიან ქვეყნის პირველი პირები, პოლიტიკოსები, დიპლომატები, საერთაშორისო ორგანიზაციების წარმომადგენლები. ისინი მწუხარებას გამოთქვამენ მსოფლიოში ცნობილი ღირსშესანიშნაობის გამო და ფრანგ ხალხს მხარდაჭერას უცხადებენ.

ემანუელ მაკრონი, საფრანგეთის პრეზიდენტი

"ემოციურია მთელი ერისთვის, ყველა კათოლიკესთვისა და ფრანგისთვის. ყველა ჩვენი თანამემამულის მსგავსად, დამწუხრებული ვარ, როცა ვხედავ, როგორ იწვის ჩვენი ნაწილი".

სადიკ ხანი, ლონდონის მერი

"სამწუხარო სცენაა ნოტრ დამი ცეცხლის ალში. ამ მწუხარებაში ლონდონი პარიზის გვერდითაა და მხარს უჭერს, როგორც ყოველთვის".

ფრანსუა ოლანდი, საფრანგეთის ყოფილი პრეზიდენტი

"ნოტრ დამი ჩვენი საერთო სიმდიდრეა. პატივისცემას გამოვხატავ მეხანძრეების მიმართ, რომლებიც ცდილობენ ხანძრის ჩაქრობას".

ანგელა მერკელი, გერმანიის კანცლერი

"რა მტკივნეულია ცეცხლმოკიდებული ტაძრის საშინელი სურათის ნახვა. ნოტრ დამი საფრანგეთისა და ჩვენი ევროპული კულტურის სიმბოლოა. ფიქრებით ჩვენს მეგობარ ფრანგებთან ვართ".

დონალდ ტუსკი, ევროპული საბჭოს პრეზიდენტი

"პარიზის ღვთისმშობლის ტაძარი მთელი ევროპის ღვთისმშობელია. დღეს ყველა პარიზის გვერდით ვართ"

დონალდ ტრამპი, აშშ-ს პრეზიდენტი

"საშინელებაა პარიზში ნოტრ დამის საკათედრო ტაძარში მასიური ცეცხლის ყურება. იქნებ, მფრინავი წყლის ავზები იქნას გამოყენებული მის ჩასაქრობად. საჭიროა სწრაფად მოქმედება".

მაიკ პენსი, აშშ-ს ვიცე-პრეზიდენტი

"ნოტრ დამი მთელ მსოფლიოში რწმენის სიმბოლოა და გულდასაწყვეტია, უყურებდე, როგორც იწვის ღმერთის სახლი. ჩვენი ფიქრი და ლოცვა მეხანძრეებთანაა, რომლებიც ებრძვიან ცეცხლს და ასევე ფრანგ ხალხთან".

სალომე ზურაბიშვილი, საქართველოს პრეზიდენტი

"თვალს ვადევნებ საშინელ ხანძარს პარიზის ღვთისმშობლის ტაძარში. საქართველო ფრანგი ხალხის გვერდითაა"

მელანია ტრამპი, აშშ-ს პირველი ლედი

"მე გული მტკივა ფრანგი ხალხის გამო, მას შემდეგ რაც პარიზის ღვთისმშობლის ტაძარში ცეცხლი გაჩნდა. ვლოცულობ ყველას უსაფრთხოებისთვის".

მამუკა ბახტაძე, საქართველოს პრემიერ-მინისტრი

"შოკირებული და დამწუხრებული ვარ პარიზის ღვთისმშობლის ტაძრის კატასტროფული ხანძრის გამო. განსაცდელის ამ მძიმე წუთებში ჩვენი ფიქრები პარიზისა და საფრანგეთისკენაა მიმართული".

ტერეზა მეი, ბრიტანეთის პრემიერ-მინისტრი

"ფიქრებით ახლა ფრანგ ხალხთან და სამაშველო სამსახურის თანამშრომლებთან ვარ, რომლებიც ალში გახვეული ტაძრის გამო იბრძვიან".

ჰილარი კლინტონი, აშშ-ს ყოფილი სახელმწიფო მდივანი

"პარიზის ღვთისმშობლის ტაძარი არის სიმბოლო, რომ კაცობრიობას დიადი მიზნისთვის გაერთიანება შეუძლია, რათა ააშენო სულისშემძვრელი სალოცავები, რომელთა აგება ერთ ადამიანს არ შეუძლია. ვუსურვებ საფრანგეთს ძალასა და ერთიან მიზანს მაშინ, როდესაც ისინი გლოვობენ და მაშინაც, როდესაც დამწვარის აღდგენას დაიწყებენ".