რუსთავის ეპარქია სასულიერო პირების დაპირისპირირების ვიდეოს ასაჯაროებს. გამოქვეყნებულ ვიდეოში ჩანს, რომ სასულიერო პირები ერთმანეთს სიტყვიერად დაუპირისპირდნენ, მათ შორის არის ბერი გაბრიელი, რომელიც ეპარქიის 14 სასულიეო პირს ცემაში ადანაშაულებს. ვიდეოს ბოლოს კი სასულიერო პირებმა ბერი გაბრიელი ოთახიდან გაიყვანეს.

"ბოლო პერიოდში დიდი აღშფოთება გამოიწვია რუსთავის ეპარქიაში, ბერი გაბრიელის ირგვლივ განვითარებულმა მოვლენებმა. გვესმის უამრავი ცილისმწამებლური მითქმა-მოთქმა იმის შესახებ, თითქოს მას რუსთავის ეპარქიის სამღვდელოება ფიზიკურად გაუსწორდა. აქედან გამომდინარე, გადავწყვიტეთ, გავასაჯაროოთ იმ კრების ვიდეო მასალა, რომელზეც მოხდა აღნიშნული დაპირისპირება. დაე საზოგადოებამ თუ მრევლმა თვითონ განსაჯოს მტყუან-მართალი", — ნათქვამია ეპარქიის განცხადებაში.

ბერმა გაბრიელმა ფიზიკური დაპირისპირების შესახებ გადაცემა იმედის კვირაში ისაუბრა. სიუჟეტის მიხედვით, ბერსა და სასულიერო პირებს შორის დაპირისპირება Facebook live-ში ლოცვების წაკითხვის აკრძალვის შემდეგ დაიწყო.

23 მარტს მამა გაბრიელმა სოციალურ ქსელში დაწერა, რომ რუსთაველმა მიტროპოლიტმა, მეუფე იოანემ ფეისბუქის პირდაპირ ეთერში ლოცვა აუკრძალა და მისი არგუმენტები არ გაითვალისწინა. იმედის ინფორმაციით, ამის შემდეგ ბერს, სასულიერო პირებსა და მიტროპოლიტს შორის შეხვედრა გაიმართა, სადაც დაპირისპირება მოხდა.

"სატრაპეზოში, სადაც მეუფე და დაახლოებით 60-მდე მღვდელი იყო, იქ შევედი და ჩემი დაბარების მიზეზი ვიკითხე, რაც დაახლოებით ვიცოდი. მღვდლები ძაღლებივით დამესივნენ, ვინ მირტყამდა, მათ სახეებსაც ვერ ვხედავდი", — იმედის ცნობით, დაწერა ბერმა გაბრიელმა სოციალურ ქსელში, მოგვიანებით კი პოსტი წაშალა.

იმედთან საუბარში თვითმხილველი ამბობს, რომ მეუფის სატრაპეზოდან ხმაური გაიგო, შემდეგ კი დაინახა, რომ მამა გაბრიელი ორმა მღვდელმა შენობიდან გაიყვანა. თვითმხილველი ამტკიცებს, რომ ბერი სასულიერო პირებს კოჭების დახვრეტით დაემუქრა. მისივე თქმით, ბერმა გაბრიელმა მიტროპოლიტსა და 14 სასულიერო პირს სიტყვიერი შეურაცხყოფა მიაყენა, საცემადაც გაიწია, რის გამოც ეპარქიის ტერიტორია დაატოვებინეს.

მიტროპოლიტი მეუფე იოანე ამბობს, რომ ბერი შეხვედრაზე მთვრალი მივიდა და მათთან ჭიდაობა დაიწყო. მისივე თქმით, ბერი არავის უცემია და მან საფეხურს გაკრა ფეხი, წონასწორობა დაკარგა და წაიქცა.

ბერი მიტროპოლიტის საპასუხოდ აცხადებს, რომ წაქცევასთან დაკავშირებით მეუფე იოანემ სისულელე თქვა. მისივე თქმით, ის შეხვედრაზე ნასვამი არ მისულა. ბერი გაბრიელი რუსთავის წმ. პეტრე-პავლის სახელობის მონასტერში 8 თვე მსახურობდა. მას რუსთავის ეპარქია 27 მარტს დაატოვებინეს.