პარლამენტში ქუთაისიდან თბილისში გადმოსვლის შემდეგ ბევრი უცნაურობა ხდება. ხმაურით შეწუხებულმა დეპუტატებმა ჯერ ყურსასმენები მოითხოვეს და დღის ბოლოს თავის ტკივილის წამლები მოიმარაგეს, შემდეგ დარბაზში "დინამიკების" დამონტაჟებისთვის 100-100 ლარის შეგროვების იდეა წამოაყენეს. ამ ყველაფერს ფერების აღქმის პრობლემაც დაემატა. ოცნების დეპუტატები წითელ და მწვანე ფერებს ვეღარ არჩევენ და ხმის მიცემისას ღილაკებიც ერევათ.

ღილაკების ფერების არევამ დალაგებულ პარლამენტში ყველაფერი თავდაყირა დააყენა. უმრავლესობამ გუნდიდან წასული დეპუტატი ზვიად კვაჭანტირაძე კომიტეტის თავმჯდომარეობიდან ვერ გადააყენა. შეშინებულმა ქართულმა ოცნებამ ხმის მიცემის წესები სახელდახელოდ ამობეჭდა, 16-იანი შრიფტით და დეპუტატებს მაგიდაზე დაახვედრა. სასწავლო მასალამ ზაზა ხუციშვილს ვერ უშველა. მან კვიციანის დისკრიმინაციულ კანონპროექტს მხარი დაუჭირა და მოგვიანებით მხარდაჭერა ღილაკების არევით ახსნა.

რომელი სულელური ინიციატივები იქცეოდა კანონებად, დეპუტატებს ხმის მიცემის ღილაკები ქუთაისის პარლამენტშიც რომ არეოდათ? — რამდენიმე ამოვარჩიეთ და თამამად, შეიძლება ითქვას, რომ გადარჩენილები ვართ!

1. ბუსუსებიანი პრეზერვატივების აკრძალვა

ქართული ოცნების დეპუტატებს ფერების აღქმის პრობლემა 2016 წელსაც რომ ჰქონოდათ, ბუსუსებიან პრეზერვატივს ვეღარ იყიდდით და შედეგად, პრეზერვატივების ბაზარზე მრავალფეროვნებითაც ვეღარ დატკბებოდით.

ქართული ოცნების ხელისუფლებაში მოსვლის შემდეგ ბუსუსებიანი პრეზერვატივი ერთ-ერთი პირველი განსახილველი საკითხი იყო. კანონპროექტი უკან გაიწვიეს, თუმცა ისტორიას მაინც შემორჩა მაშინდელი ქართული ოცნების დეპუტატების ფრთიანი ფრაზები.

კობა დავითაშვილი: "არსებობს ორი სახის პრეზერვატივი, ერთი დაცვისთვის და მეორეს აქვს სექსუალური სურვილის დაკმაყოფილების ფუნქცია. აი, სწორედ ის ვერ გაიყიდება და ასეთი გაიყიდება".

2. სერიალების აკრძალვა

კობა დავითაშვილმა მოზარდთა დაცვის მიზნით, სერიალებისა და აზარტული თამაშების აკრძალვა მოითხოვა. დეპუტატის აზრით, უნდა აკრძალულიყო ყველა ის სატელევიზიო გადაცემა თუ შოუ, რომელიც პოლიგამიურ, ჰომოსექსუალურ და ბისექსუალურ ურთიერთობებს "უწევდა პროპაგანდას".

მაშინ რომ დეპუტატებს ღილაკები არეოდათ, ცხოვრებას გასპარ ნოეს სიყვარულის, Sense8-ის გარეშე დაასრულებით და აღარც ლურჯი იქნებოდა ყველაზე თბილი ფერი.

3. ტრადიციული სამოსი პარლამენტში

წარმოგიდგენიათ პარლამენტის პლენარული სხდომა, სადაც გუგული მაღრაძე ჩიხტიკოპით, სოფო კილაძე კი სადიაცოში გამოწყობილი ზის, ზაქარია ქუცნაშვილს ჩოხა-ახალუხი აცვია, ემზარ კვიციანი კი წაღებს ისწორებს?!

ეროვნული სამოსით საქართველოს პარლამენტში სიარულის ინიციატივა ბიძინა გუჯაბიძემ წამოაყენა. მოგვიანებით, კი თავისი იდეის შთამბეჭდაობაში დასარწმუნებლად თავად ჩაიცვა თეთრი ჩოხა და პარლამენტში მივიდა. მოგვიანებით, დეპუტატები ერთხმად მივიდნენ გადაწყვეტილებამდე, რომ "პარლამენტს უფრო სერიოზული საკითხები უნდა განეხილა".

4. ეკლესიის მდივანი პარლამენტში

ემზარ კვიციანს, სოფო კილაძეს, მარიამ ჯაშს, ზაზა ხუციშვილს ან ნებისმიერ სხვას რომ ღილაკები არეოდა, პარლამენტში ეკლესიის წარმომადგენელი იჯდებოდა. ალბათ სესიას, არა ჰიმნით, არამედ ლოცვით გახსნიდნენ, სიტყვით გამოსვლამდე კურთხევასაც აიღებდნენ. ნეტა, შარვლებით სიარულიც აიკრძალებოდა?

5. აიკრძალოს საფლავზე დალევა, ჭამა, ყვავილები; 3 დღე არდასაფლავება

ეს ერთი შეხედვით "მიცვალებულთან მოპყრობის ქართული ტრადიციის ჩამოშლის ინიციატივა" პარლამენტში ჯერ კიდევ განსახილველია. მიცვალებულისადმი მოპყრობის კანონით დარეგულირებას მოქალაქე ანზორ ჯაიანი ითხოვს. ეს ის შემთხვევაა, როცა ღილაკების არევას ჩვენც დიდი ინტერესით ველოდებით.