საინფორმაციო კამპანიას – არა ინტელექტის ოკუპაციას! — “სანო სტუდია” ეხმაურება. ოფიციალური განცხადება ფეისბუქის ოფიციალურ გვერდზე გამოქვეყნდა. როგორც განცხადებაშია ნათქვამი, საქართველოს წარმატება აღიზიანებს რუსეთს, რის გამოც რუსეთი ცდილობს გავლენა იქონიოს ქართულ ხელოვნებაზე.

"როგორც საზოგადოებისთვის ცნობილია, საქართველოში საავტორო და მომიჯნავე უფლებების კოლექტიური მართვის ორგანიზაციას წარმოადგენს საქართველოს საავტორო უფლებათა ასოციაცია. ასოციაცია უკვე წლებია, საკმაოდ წარმატებულად მუშაობს. იგი აერთიანებს 2000-მდე ხელოვანს, რომელიც რეგულარულად იღებს კუთვნილ ჰონორარს. ასოციაციის წარმატება აღიარებულია არაერთი საერთაშორისო ორგანიზაციის მიერ", - წერია განცხადების დასაწყისში.

სანო სტუდია წერს, რომ რუსეთი ცდილობს გავლენა იქონიოს ქართულ ხელოვნებაზე და ასოციაცია ევრაზიულ კავშირში შეიყვანოს, რაზეც უარი მიიღო. ამის შემდეგ, რუსეთმა გადაწყვიტა ასოციაციის დასუსტება და სისტემის მოშლა, რისთვისაც დასაყრდენად მოძებნა რუსეთში მოღვაწე ქართველი მომღერლები და მათი დახმარებით დაიწყო ასოციაციის დისკრედიტაცია, მისი წევრების მოსყიდვა და ცრუ დაპირებების გაცემა.

განცხადებაში ნათქვამია, რომ ეს ყველაფერი ემსახურება რუსული გავლენის მოპოვებას, რაც მკვეთრად უარყოფითად აისახება როგორც ქვეყნის იმიჯზე, ასევე იმ ასეულობით ავტორზე, რომელიც ასოციაციისგან იღებს ჰონორარს. ამ ყველაფრის თავიდან აცილების მიზნით, ასოციაციამ წამოიწყო კამპანია – არა ინტელექტის ოკუპაციას!

"გვსურს, შევუერთდეთ კამპანიას და მოვუწოდოთ მუსიკალურ საზოგადოებას (და არამარტო), გაერთიანდეს კამპანიაში. არ უნდა დავუშვათ ქართულ ხელოვნებაში რუსეთის ინტერესების გატარება!", – აღნიშნულია “სანო სტუდიის” მიერ გავრცელებულ განცხადებაში.

არა ინტელექტის ოკუპაციას! — ამ სახელწოდების კამპანია, საავტორო უფლებათა ასოციაციის ინიციატივით სამი კვირის წინ დაიწყო და უკვე 100-ზე მეტ ცნობილ ადამიანს აერთიანებს, მათ შორის დათო ევგენიძეს, ნეკა სებისკვერაძეს, გია ყანჩელს, ირმა სოხაძეს, სტეფანესა და სხვა).

კამპანიის მიზანია საზოგადოებამდე მიიტანოს ინფორმაცია საავტორო უფლებების სფეროში, რუსული საფრთხის შესახებ, რომელიც ბოლო პერიოდში აშკარა გახდა.