ზიანის შემცირების ეროვნულ კონფერენციაზე აქტივისტებმა პროტესტის ნიშნად იმ პოლიტიკოსების ბანერები მიიტანეს, რომლებიც კონფერენციას არ ესწრებიან. წინა რიგში აქტივისტებმა დავით სერგეენკოს, გიორგი გახარიას, სოფო კილაძის, არჩილ თალაკვაძისა და ირაკლი ღარიბაშვილის ფოტოები გამოფინეს. ფოტოებს ლიბერალი ავრცელებს.

აქტივისტი, მარიამ უბილავა ლიბერალთან ამბობს, რომ ეს პოლიტიკოსები კონფერენციას უნდა ესწრებოდნენ და ჯანდაცვის სფეროდან ადამიანებს, აქტივისტებსა და დარგის სპეციალისტებს უსმენდნენ.

"კონფერენცია ეხება ისეთ თემებს, რაზეც მნიშვნელოვანია რომ იყვნენ გადაწყვეტილების მიმღები პირები. ვფიქრობთ, რომ ასე გამოვხატავთ ჩვენს მინიმალურ პროტესტეს", — აცხადებს აქტივისტი.

ზიანის შემცირების ეროვნულ კონფერენციაზე ნარკოპოლიტიკასა და ზიანის შემცირების ხელმისაწვდომობაზე მსჯელობენ. მას ადგილობრივი და საერთაშორისო ექსპერტები, პოლიტიკოსები, მკვლევარები, სტუდენტები, თემის წარმომადგენელი და დაინტერესებული პირები ესწრებიან.